豚勝 Tsukanto：一「豚」和氣好脂味

「吉列」喺其中一類甚討歡心嘅菜式，相信亦有好多人都鍾意，而日本嘅吉列又真喺做得確有一手，最近，就知一間日本過江龍餐廳「豚勝」落戶香港，故此，就同朋友今晚嚟到「圓方」會一會佢 ，試試佢哋吉列豬嘅魅力。

餐廳鋪面好大，門口左邊，設咗啲等候位，如遇正人多，都可以坐住嚟等，尤其有老人家或小朋友，唔使被罰企。此外，晌呢個位仲做咗啲豬仔裝飾，都幾可愛，算喺個打卡位。

餐廳嘅裝修明顯就喺走簡約木系和風，一室簡潔明亮，燈光柔和。而近門口有一排吧位，最啱得一個人嚟自己食。

再走入嘅，就喺主用餐區，都喺啲2、4人枱，始終打着過江龍嘅名氣，所以，斷斷續續咁，全場近乎滿座。我哋剛好被安排坐晌一角，方便傾偈。

此外，其實鋪面正對面仲有一個用餐區，話大唔大，話細唔細，環境同事都幾雅致。順帶一提，招呼好唔錯，侍應態度殷勤，不時主動添茶。

雖然話主打喺吉列，其實，都有非常多選擇，以分類計，包括：炸物、丼物、咖喱、麵食、和食、小食，仲有埋兒童餐。既然店名以「豚」字起首，其里肌豬同豬柳自不然咪錯過啦！而飲品方面，有多款清酒、燒酎、果酒、啤酒及果味梳打……等等。

正所謂「工欲善其事，必先利其器」，食吉列豚都要有個好配搭，先嚟碗白芝麻俾你手動研磨，再加上自家製嘅醬汁，食出獨特風味。仲有另外兩款醬：紫蘇沙律汁同柚子醬，等你配以其他菜式。

靜岡綠茶可樂、完熟水蜜桃汽水 $48
諗住食吉列豬扒，點都要搵啲汽水飲品爽一爽吓嘅，老友就要咗個綠茶可樂，小弟試咗一小啖，又真喺幾有可樂味，又有啲綠茶香，幾個癮。我就揀咗個水蜜桃汽水，蜜桃味清香，感覺非常之清爽，襯熱焫焫嘅吉列豬扒就啱晒。

吉列大海老配豬柳定食 $258

我哋所揀嘅兩款定食都思考過嚟，一次過就可以試到里肌豬、豬柳、大海老同佢哋嘅咖喱。先分享呢一款大海老拼豬柳，配以大量爽脆嘅椰菜絲，非常有睇頭，而椰菜絲同白飯都可以無限量添加。先講隻吉列大海老，唔使多講，堅大隻，蝦肉鮮味十足，口感彈牙，蝦頭仲有少少蝦膏；豬柳亦都非常正，肉質好軟腍，又夠晒肉味，沾上酸香嘅豬扒醬，「脂」味更上一層樓。

咖喱吉列厚切里肌豬扒定食 $228

每道定食都會配上麵豉湯、蘿蔔漬，前者做香濃，麵豉味甚突出，而後者酸香爽脆，甚有清清味蕾之效。講到件吉列厚切里肌豬扒，炸得色澤金黃，一口咬落去，咔嚓脆口到不得了，又唔油膩，而肉質鬆化，富肉汁，卻帶點脆口感，沾上咖喱就更正；而咖喱有別一貫日式咖喱帶甜嘅印象，反而辛味幾強勁，但辣得嚟點到即止，唔會太嗆喉。另外，還伴有一隻「炸蛋」，很有流心效果，真喺幾得！

不愧過江龍，有一定質素，事後先慢慢睇番個餐牌，原來啲豚肉喺以日藉主廚嘅法式做法，先用低溫慢煮處理，然後再炸至9成熟，讚呀！

個人評分
味道：9/10
環境：8/10
服務：9/10
抵食：8/10
平均每人消費：HK$320

餐廳資料：
豚勝 Tsukanto
地址：尖沙咀柯士甸道西1號ELEMENTS圓方火區1樓1002號舖
電話：2331 3822