Peko Peko：不似預期

又喺同老婆嚟荃灣嘅「英皇」睇戲，喺我哋不時星期六朝嘅最佳節目，睇完就剛好正午，放飯時段。又於疫情近排都仲喺居高不下，所以，食晏都搞間人少啲，地方闊落啲，等老婆食得安心啲。最後晌「海之戀」兜咗個圈，「Peko Peko」似乎最合我哋要求。

餐廳環境唔錯，整體感覺真喺幾闊落，加上對外一面全部落地大玻璃窗，採光十足，景觀開揚，加上客人唔多，又放有唔少植物，增添自然感，不過，唯可惜到訪當日天氣又麻麻。

相信好多人嚟都喺貪佢哋嘅「Peko Signature」套餐夠彈性，因為，好簡單，頭盤、主菜都各有5款選擇，而套餐配搭喺2個頭盤+1個主菜，又或1個頭盤+2個主菜，然後再選珍珠飯或胡麻烏冬，配埋餐湯+冷泡伯爵茶，定價$98，需收加一。另外，亦可以加錢配其他飲品，追加頭盤、主菜及甜品。

如果呢個套餐唔啱食，仲有多款散點嘅項目，話散點啫，其實，又可以加錢升級為套餐，都極具彈性。

心理作崇，覺得1頭盤+2主菜嘅組合喺抵啲，所以，我哋都喺咁揀法。雖然話此刻人少，基本上，唔使5分鐘就上晒兩份餐，差啲快過兩餸飯，而賣相幾精緻。

草莓牛油果雞胸沙律、野菜豆腐魚餅、鹽燒鯖魚、胡麻烏冬、忌廉湯、熱紅茶 $98

呢個喺老婆所選嘅配搭，算喺比較健康少少，但所揀兩款主菜嘅份量感覺有啲偏少。先講個沙律，夠晒誠意呀，有草莓、紅菜頭、牛油果、嫩雞胸，再墊少少沙律菜，撒少少杏仁片，比起一般田園沙律就高幾班啦，況且，又新鮮好食；主菜嘅豆腐魚餅有啲警驚喜，煎得唔油，又有魚味，不過，燒鯖魚就無咩特別喇；烏冬口感就好滑溜，依家加入胡麻汁，似食撈烏冬，感覺又幾OK喎；忌廉湯就只喺一般西餐嘅忌廉湯，可能配個麵豉湯仲合心意。

鮮果乳酪沙律、日式咖喱雞扒、慢煮燴牛面頰、珍珠飯、忌廉湯、冷泡伯爵茶 $98

小弟主菜就揀晒肉，所以，頭盤就選一道乳酪沙律。個沙律真喺得喎，一來用上啲生果都喺新鮮貨，唔喺罐頭嘢，二來生果都多樣化，簡單拌乳酪已清爽好食；主菜揀雞扒同牛面頰，份量上比老婆嗰份多好多，咖喱喺日式，帶甜味，拌珍珠米正呀喂，牛面頰口感好軟腍，不過，雞扒有部份未熟，牛面頰味道較淡，感覺差少少。

如果唔想飲凍熱，可以改熱紅茶，唔使額外加錢嘅，老婆就想飲熱茶多啲。小弟就飲番基本嘅冷泡伯爵茶，其實就平平無奇，但茶香不俗。

「愛之戀」有好多食肆，食日本嘢嘅餐廳亦唔少，食完「Peko Peko」感覺喺頭盤有誠意，又具質素，但啲主菜則一般般，整體而言，個人就覺得不過不失，但可以做得更好。

個人評分
味道：6/10
環境：8/10
服務：7/10
抵食：8/10
平均每人消費：HK$108

餐廳資料：
Peko Peko
荃灣大河道100號海之戀商場1樓1006-1007號舖
2688 9128