嘉華餐室 Ka Wah Restaurant：同場「嘉」映

又喺一篇行山後嘅茶記食評，今日最高溫上到34°C，但都無懼炎熱嘅天氣，只因一股熱血。呢次挑戰一下屯門青山，再經青山腹地到良田坳（港版大峽谷），最後落返良景邨下午茶。雖則今次人腳強，都行咗4個鐘，但都比預期5個鐘少，行完真喺幾攰吓，簡單見到近輕鐵站有家茶記「嘉華餐室」，諗都唔諗就標入去。

平常去到啲茶記，一到下午茶時段都會有幾多客，尤其啲屋邨，就更多，不過，星期六嘅3:00pm入到嚟，成個場唔多客。不過，裝修唔錯，光猛摩登，無話殘殘舊舊，加上地方大，少人啲就仲安心啲，我哋志在有個舒服嘅環境攤抖吓，補充吓體力。

呢個時間嚟，焦點就放晌啲下午茶餐啦，不過，午餐都仲有戈供應，此外，仲有堆常餐、全更天候歐陸餐。

有別一般茶記，基本餐具都放晒晌枱面藤籃內，而唔喺枱側啲暗格櫃桶，此外，枱上仲放咗啲基本調味料。

鹹牛肉炒蛋厚多士 $36

今次唔食菠蘿油喇，因為除早餐外，行程上無乜點食過嘢，有少少餓，所以，揀咗份中型份量嘅厚多士。睇樣真喺做得幾靚仔，啲滑蛋炒得嫩滑，鹹牛肉亦落得無手緊，鹹鹹香香，配多士幾唔錯，喺嫌塊厚多士好似無乜點烘過咁，唔太脆口。

熱奶茶

因為鋪內冷氣夠，行山時又補足水，所以，點杯心水嘅熱奶茶都OK。去茶記飲餐飲奶茶喺小弟嘅必然之選，亦喺最穩膽嘅選擇。眼前嘅熱奶茶個人而言，只可以講喺OK，茶底喺有水準，芳香馥郁，只喺絲滑度一般。

我哋一班行山友成日講笑，行山喺前菜，嘆下午茶先喺主菜，講真，出一身大汗，筋骨舒展吓，幾攰都好，嘆嘆冷氣，食個茶餐，真喺爽晒。

個人評分
味道：8/10
環境：7/10
服務：7/10
抵食：8/10
平均每人消費：HK$35

餐廳資料：
嘉華餐室 Ka Wah Restaurant
屯門田景路31號良景廣場良景街市地下LK1號舖
6977 7815