五月牛雜粉麵：單挑大戰牛魔王

晌葵涌區，就算上到嚟石籬、石蔭、安蔭一帶，都會有少少小弟搵食嘅足跡，不過，「石籬街市」就真喺未嚟過，原來，個街市翻新後變得咁有型，內部裝修做成咗一個個懷舊場景中。而街市內，有一邊僻成美食廣場嘅營運模式，亦都有少量入鋪嘅食店。今日同朋友行轉短山，由美孚經馬騮山上華景，再落返石籬，到中午，快快手搵間食港式粉麵嘅「五月牛雜粉麵」填肚。

不如先講講個街市，真喺幾有亮點，尤其早一輩嘅人，相信對呢啲場景好有共鳴，好有親切感，最正仲喺冷氣街市，夏天嚟到買嘢就特別爽，而且，地方好乾淨企理。無刻意比較啲價錢，可能比出面啲街市會貴少少。

而上文提到嘅美食廣場，行一轉都見有好多唔嘅小店，泰式、台式、港式……等等，最搞嘢喺個場佈置到舊時啲大牌檔格局，非常有懷舊味道。

至於「五月」裡面嘅環境，其實如一般粉麵店咁，簡單裝修，老派格局，牆身、枱面都貼滿餐牌；有啲圓枱仔，兩邊喺卡位，但勝在整潔企理，又唔會拍到啲枱櫈好逼。

話粉麵檔，但其實都有啲茶記嘢，詳細有咩食就唔講，反正貼出張外賣紙出嚟，就一目了然睇得晒。

筷子、調味料晌晒枱面，自由取用。

必食牛魔王河 $50

既然店名加上「牛雜」二字，當然要試試其牛雜啦，睇勻呢個牛魔王最牛，因為一碗過有齊晒牛雜、牛腩及牛筋，而牛雜本身已經有好幾種內臟，真喺牛迷必點，不容錯過。

果然喺牛魔王呀，啲崩沙腩炆得好鬆化，又甚具肉香，黐住少少膏，脂香十足，牛筋就柔滑有咬口感，炆得入味，牛肚就好爽口，唔會韌到咬唔開，牛肺入口好軟腍，牛膀則咬落有種沙沙嘅口感，牛腸洗得夠乾淨，一啲臊味、羶味都無，而河粉細滑，伴以濃香嘅腩汁，豐厚好食。

凍咖啡 +$5

行完山都口渴，所以，一坐低就先要杯凍啡降吓溫兼解解渴，食粉麵可以加$5配冷熱飲品。杯咖啡唔錯，喺傳統港式茶記嘅口味，入口都幾濃厚，配腩河都好夾。

碗「牛魔王」真喺好足份量，食完堅喺飽晒，落番山搭地鐵返屋企，咁又完咗半日嘅行程。

個人評分
味道：8/10
環境：7/10
服務：7/10
抵食：8/10
平均每人消費：HK$55

餐廳資料：
五月牛雜粉麵
地址：葵涌圍乪街6號石籬商場一期地下石籬街市13號舖
電話：3169 0979