Peloton：美味唔「單」一

年初行完山，再過嚟將軍澳嘅海濱逛逛，覺得呢度真喺發展得唔同晒。住晌將軍澳嘅食友告之，臨近海濱長廊有個新場「海天晉滙」，裡面有唔少卧虎藏龍嘅食肆，咖啡店、茶飲店、日式、韓式、德國菜、意法、蠔吧……等等，部分更喺寵物友善餐廳，以及有一個全新室內抱石場（唔喺攀石場喔），真喺好值得一訪。

商場嘅入口就晌「唐俊街」街尾單車泊位側，近入口就有家大型韓國超市，啱晒老婆入少少貨，而另一側山系單車主題咖啡店嘅「Peloton」就喺我哋今次用餐嘅地方。講開單車，呢區有全港唯一嘅單車館，而新落成無耐由調景嶺至日出康城嘅單車徑亦都好正，沿途都喺海景！

走進餐廳，一面落地大玻璃，陽光十足，只可惜對出仲喺工地，臨海嘅公園未知何時完工，否則景觀更開揚。整體裝修簡約，以木系為主，枱櫈嘅編排亦見闊落，樓底有番咁上下高，所以，空間感認真唔錯。

既然喺山系單車作主題，店內當然有唔少相關主題嘅擺設，單車啦，露營摺椅啦，都幾得意架。仲有少少單車配件及露營用品作為零售。題外話，原來「Peloton」嘅意思喺指一班踩踏單車嘅人一齊去完成一件事，都頗有意思。

此外，亦有少量戶外露天位，不過，呢排日日都酷熱警告，都喺乖乖坐番晌室內吧！

再翻一翻餐牌，類別就分為全日早餐、輕食、意大利麵、意大利飯、烘焙、甜點、小食、湯品……等等，睇落款式都幾特別，西式中加入唔少東南亞元素，而飲品亦多元化，如茶品、果汁、咖啡、特飲、沙冰、特色茶品、啤酒……等等，如果有啲飲品加配優惠就更好喇。

鮮雜莓、紅火龍果乳酪 $78

正值夏日炎炎，先嚟一道乳酪作為我哋嘅頭盤，大可清爽一下。雪白嘅乳酪之上，放滿咗士多啤梨、藍莓、紅肉火龍果、青蘋果片、蜜糖脆脆，色彩繽紛，絕對喺高打卡度。入口涼透心，生果非常鮮甜，乳酪酸香醒胃，喺一道好消暑嘅前菜。

煙三文魚、牛油果、忌廉芝士、比高包拌薯條 $88

漢堡就食得多，輕怡少少試試一份比高包，有煙三文魚、牛油果，完全喺老婆嘅心水食材，仲伴有炸薯條及沙律菜，賣相擺得靚仔。比高包喺烘過嚟，咬落有韌勁，配上煙三文魚及牛油果已經好好食，再塗上忌廉芝士，就喺有畫龍點睛之效，好味道指數立時提升。而薯條炸得香脆不膩，又有薯香，不得不提，沙律菜淋上嘅黑醋喺煮過嚟，所以，食到口感喺杰身啲，酸香度喺醇濃啲。

冬陰功海鮮椰香手打意大利麵 $108

睇見喺手打意麵，就自然秤高兩班，加上融入泰式冬陰功元素，一道充滿東南亞風情嘅意大利麵，更有興趣一試。份量真唔少喎，麵條都掛滿汁，先試一吓啲麵條，果然煙韌有咬口，仲有甚具蛋香，掛滿冬陰功汁，汁底既有香料味，又充滿椰香，淨喺食個意大利麵都正呀！至於啲虎蝦同青口都出色，前者蝦味濃，口感爽彈，後者保持鮮味，卻唔會好似啲平價貨咁韌到咬唔開。

烤龍蝦、龍蝦沙律、牛油果、班戟、田園沙律 $148

甜嘅班戟就食得多，最後登場喺一道鹹食嘅班戟，仲要搞到好高檔架，加入烤龍蝦，班戟中又夾有龍蝦沙律，襯埋牛油果及田園沙律，賣相好有睇頭。烤龍蝦燒得香口，蝦肉鮮甜彈牙，班戟方面，亦有驚喜，因為裡面嘅龍蝦沙律撈咗啲明太子，鹹香味更具層次，班戟又煎得軟綿，配上牛油果同沙律菜，食起嚟更覺健康喎。

Nutella Chocolate $45
一提到「Nutella」呢個品牌，就知佢等於朱古力榛子醬，呢杯凍朱古力就加入朱古力榛子醬，成品飲落朱古力味頗濃郁，不過，榛子味唔算好強。

桂花雪梨茶 $50

喜歡茶品嘅朋友就千祈唔好錯過店家多款嘅特色茶飲，每款都好有功效，就好似呢一杯桂花雪梨茶，睇得到所有材料都喺天然嘢，店員吩咐先焗10分鐘，再以杯蓋盛起個茶隔，茶色清澈，既有桂花香氣，又有雪梨嘅清甜味，入口非常之潤，又好生津，秋涼時飲就仲正。

遠離調景嶺站，過到嚟海濱長廊，感覺有種別有洞天，晌周末嚟打個轉，踩吓單車，真喺幾唔錯嘅節目。

個人評分
味道：9/10
環境：8/10
服務：8/10
抵食：8/10
平均每人消費：HK$170

餐廳資料：
Peloton
將軍澳唐俊街28號海天晉滙地下G03-04號舖
9889 0260