果子 Life Cafe：望梅「子」渴

向來都鍾意食馬拉菜，所以，工作關係，過到嚟紅十字會總部一頭，經過呢一家主打海南雞飯、喇沙摻摻嘅外賣店「果子」，加上睇見啲價位咁相宜，就一於試試佢，買啲外賣返去做晚餐，又做一晚無「煮」孤魂，乾手淨腳唔使煩。

環境其實晌鋪外都一眼睇晒，因為喺外賣店嚟，收銀櫃檯之外，側旁就只喺得一部大雪櫃擺放飲品。

食物方面，飯類又唔只得海南雞飯，仲有好多飯品，而喇沙摻摻亦同樣有好多款式，更提供豬骨湯底嘅粉麵，此外，更可要求多飯或多麵，都唔會額外收錢，真疏爽。店家仲提供多款小食，有啲都頗有特色，款款都喺十零、廿蚊，值得試。

飲品方面，一大個雪櫃放晌側邊，原來喺有意思，因為睇番佢啲定價，真喺平過便利店，所以，晌等候期間，真喺見到好幾個客行過都喺買支嘢飲。而我都買咗支黑芝麻豆漿，低糖加上用有機豆，都喺$6支，味道濃郁喎。

最終，當然喺試試店家啲招牌嘢啦，所以一客海南雞飯、一客喇沙摻摻、一款小食，再加個炒菜，要多支黑芝麻豆腐，夾夾埋埋都喺$145，非常划算。

白雲酸辣鳳爪 $16

諗住天氣熱熱哋，亦唔想食太多油炸嘢，所以，揀個清爽嘅酸辣鳳爪作為涼拌前菜。鳳爪入口好爽口，而酸得嚟唔會嗆喉，微微辣，絕對喺平易近人嗰種辣度，夏天食，襯喇沙真喺幾錯。

森巴通菜 $20

一餐飯要夠平衡，點都要有番多啲纖維素，所以，揀咗個惹味少少嘅森巴通菜，森巴醬跟我哋嘅蝦醬好類似，用嚟炒通菜相信大家都唔陌生，味道鹹香，帶微微辣，啲通菜炒得又夠爽口。

果子無骨海南雞飯 $38

無花無假，真喺賣$38，平過快餐店啲碟頭飯，但份量絕無將貨就價，可選白飯或油飯，當然喺揀後者啦，仲配埋一碗清雞湯，抵到無朋友，更佐三色醬，真喺無欺場。先飲淡湯，唔會話成層油咁，飲落香濃不膩，好鮮甜，加咗冬瓜煲，夠消暑，而油飯亦出色，飯粒分明、爽身，帶少少油香，卻唔膩；輪到食啲雞肉，雞皮好爽，啲肉又好嫩滑，加上已去骨，啖啖肉，襯薑蓉、辣醬、黑醬油，都咁好食。

帆立貝喇沙摻摻 $65

另一招牌梗喺試佢哋嘅喇沙摻摻，揀咗個貴少少嘅帆立貝款式，堅有3大隻帆立貝，而且，仲有好多鮮蜆及半隻蛋，最貼心喺湯、麵喺分隔盛載，咁就唔怕浸腍。其實啲摻摻（油麵+米粉）真喺份量十足，口感特別，金黃嘅喇沙湯亦濃厚易掛湯，香咪有層次，微辣醒胃，撈埋啲摻摻一齊人食真喺正；而湯內仲有豆卜、魚蛋，當然啲帆立貝同襯都好鮮甜，喺非常豐富嘅喇沙摻摻。

所以呢，馬拉嘢真喺幾合我哋口味，對上一次去大馬旅行已經喺2014年嘅事，真喺好希望快啲通關，走一轉大馬，今餐，食住馬拉菜，望梅止渴先啦！

個人評分
味道：8/10
環境：7/10
服務：7/10
抵食：8/10
平均每人消費：HK$73

餐廳資料：
果子 Life Cafe
大角咀海庭道16號富榮花園二期4座地下E號舖
2777 0886