東京チカラめし Tokyo Chikara Meshi：「丼」局者迷

好耐無出嚟旺角，嚟親都喺買波鞋，上一期嘅消費券趁仲有剩少少，當然用埋唔好嘥。之後就順便搵食，因為正正趁老婆有事，屋企無飯開，就一支公出嚟買嘢兼食埋晚飯。經過呢間過江龍「東京チカラめし」頗有人氣吓，就入去試試牛丼。

餐廳內裡嘅格局好日本丼飯專門店，即喺一室木系裝修，環境整潔又光猛。裡面坐滿客，雖然小弟一支公，想快啲食完就走，店員問介唔介意搭枱，會加塊膠板隔住，咁我都OK嘅。

食物選擇有牛丼、豬丼、咖哩同定食，仲有多款配菜可額外添加，大部份定價都好相宜，而飲品就有啲汽水（$12）同樽裝茶（$16）。

一坐低就會俾張二維碼等你自行落單，依家呢樣嘢都已經變得好普通，好多客人都識點搞。

餐具就好似時下茶記咁，放晒晌枱側嘅拉櫃內，自己招呼自己，快捷方便，好過麻煩啲店員。

此外，枱邊就放咗幾樣調味料，七味粉、醬油、辣醬和風柚子汁，後者就用嚟食炸雞同餃子時用，其他嘅，想點就點囉。

牆上仲貼有一張溫馨提示，教你點樣食先最有日本風味，個人覺得，隨心啦！

燒牛肉丼（配餃子3件） $58

真喺好彩無要加大份量，因為依家呢個份量，已經好大碗，食到我飽一飽。其實睇勻啲配搭，再睇吓啲配菜定價，以呢個組合喺最着數，再加支忌廉（$12）爽吓，就喺今晚晚餐嘅組合。

唔止飯量多，啲燒牛肉亦唔少，真喺好似食極都有，先試一件燒牛肉，色澤深沉嘅牛肉，炒得好香口，軟滑而味道濃郁。我亦有跟張提示，將牛肉跟飯撈勻嚟食，因為，底下有好多汁架。

晌門口就掛咗個「日本產米使用店」，當然，質素會優勝啲，飯粒軟熟分明，有米香，加上沾滿晒秘製醬汁，份外惹味。

再試試啲餃子，單點3隻嘅話要$18，所以，夾呢個組合喺最抵，而餃子嘅餃皮好薄，餡料又好足，椰菜豬肉餡刴得幼細，食落亦富肉汁，沾上和風柚子汁帶點酸香就更加正，但唯一挑剔喺嚟到時只喺微微暖，要扣分。

依一類日式丼飯，有人話好食，有人話唔好食，總之，鍾意食嘅就會喺當局者迷啦！

個人評分
味道：8/10
環境：7/10
服務：7/10
抵食：9/10
平均每人消費：HK$70

餐廳資料：
東京チカラめし Tokyo Chikara Meshi
旺角奶路臣街17號The Forest 地下G8號舖
2802 3308