從心素食 Heartful Veggie：細「素」近況

前文提要吓先，由於同老婆入咗嚟將軍澳「宅渡假」，個套票包自助午餐及早餐，無包夜晚，所以，專登晌夜晚約姨仔食番餐，因為自從佢搬咗去坑口，我哋都好耐無聚一聚。剛好一年多前就幫襯過「從心素食」食晏，不過，當時喺尖沙咀店，原來，亦已經執咗。因為食過覺得好，老婆又偏素，所以，特意介紹呢間素食店俾姨仔。

將軍澳店比尖沙咀店整體感覺好啲，一來位處晌大商場內，方便好多，二來地方大啲，樓底高啲，裝修雖簡約，但夠晒光猛企理，啲枱櫈又無排到密麻麻，卡位更喺特別闊落，最好就喺無滿天神佛呀，播住啲「煩」音嘛，感覺寧靜、舒服。

今次就無影到餐牌俾大家參考，只喺簡單影咗個「廚師精選、時令推介」及「精選套餐」出嚟。順帶提一提，茶錢$10位，加一就基本啦。由於中午食咗自助餐，食得超飽，所以，依刻都仲未叫好餓，故點菜都唔太多。

酥炸菜肉雲吞 $42

餐前點兩款「輕食」前菜過過口癮，先嚟一客脆口嘅炸雲吞，一客有成7件，雖然叫菜肉，裡面當然喺豆製品嘅素肉。炸得唔錯，香脆，唔油，素肉就無乜味架啦，但沾上啲甜酸醬，華麗變身唔同晒。

越式牛油果芒果米紙卷 $55

食完炸雲吞，再食番個涼涼哋嘅米紙卷就最好不過，晶瑩嘅米紙卷色彩繽紛，賣相好睇。米紙薄透，口感煙韌，內裡捲有大量沙律菜，少少牛油果咁啦，初時以為仲夾有芒果，原來喺指個汁醬，入口固然感覺清爽，更喺非常健康嘅配搭。

招牌蜜汁叉燒配片皮鴨（跟掛包6件） $118

上次就老婆介紹我試，今次就我介紹俾姨仔試，今次3個人食一客就啱啱好，因為附送嘅掛包有6件。片皮鴨要加啲幻想先夠像真，但啲蜜汁叉燒真喺好似樣，兩者份量都幾多，堆滿一大碟，仲伴有唔少青瓜絲，可作為間場清清味蕾。

今次無整「巨無霸」，除淨食外，都喺一個掛包夾上叉燒，另一個掛包夾片皮鴨。由於兩者都燒得幾香口，入口唔會「乾崢崢」，所以，配上軟熟嘅掛包，搽上甜醬，食味真喺唔錯。

芋頭西米露

本來諗住食完飯，落去下面嘅「鮮芋仙」食埋糖水先散，不過，餐廳有糖水奉送，咁就可以慳番少少。雖然只喺普普通通嘅芋頭西米露，但煮得唔差，芋頭夠粉又香，啲西米又唔會煮到爛。

中午大擦一餐，晚上清清哋食吓素都幾好，話清清哋，其實啲煮法一啲都唔喺清清清，哈哈，一個喺炸嘅，一個喺燒嘅，其實，呢餐飯重點都喺聚一聚，訴說吓近況，食物質素呢……OK就可以嘞。

個人評分
味道：8/10
環境：8/10
服務：8/10
抵食：9/10
平均每人消費：HK$90

餐廳資料：
從心素食 Heartful Veggie
地址：將軍澳重華路8號東港城2樓263C號舖
電話：2365 6788