山區裡的走走趯趯: LITE：中環小清新

工作關係，間中要在大陸山區跑呀跑，周圍走走趯趯（音：笛），所去的都是窮鄉僻壤，雖然靚景欠奉，但身處農村時，就自然有種令人感到寧靜、安然的感覺！在城市忙碌地做呀做，都是為了賺得三斗米，不過，慶幸有餘有剩等我都可以出外隨處盪，不單只見識一下不同地方的風土人情，還可以調節一下知足的心靈。小弟的旅遊足跡，可暫時瀏覽以下網址：http://travel.openrice.com/traveller/userdetail.htm?userid=49632

2022年7月12日星期二

LITE：中環小清新

被老婆話我成日都大魚大肉，其實我就唔覺喺，比起身邊好多老友，我算食得健康架啦。今餐就無得挑剔，一定喺非常健康嘅一餐，位處中環威靈頓街嘅「LITE」，主打就喺沙律，輕工業風粗獷嘅鋪面，晌中環區嚟講真喺別樹一格。

走入鋪內，雖然，只喺做沙律外賣，但地方好大，空間感好強，一邊好似啲藝術畫廊咁，如果唔講，單影一面，就喺呃到吓人睇緊藝術展覽。晌等候期間，同店員傾開，原來真喺不定期會舉辦一啲畫展及工作坊等活動。

另一邊就喺店家嘅食物製作區，一字長形開放式「廚房」，長長米色大理石工作枱，製作用具排列整齊，所有食物製作都睇得一清二楚，所以，感覺到店員更喺非常注重衛生。

食物嘅選項，除沙律，亦有兩款甜點供應，同樣喺好健康嘅選擇。至於講到沙律，散點嘅就即喺「車仔」沙律，由沙律菜底、20多款配料、6款醬汁，都自由配搭出自己嘅獨特口味，為咗更注重健康嘅客人，每樣食物都標明熱量做參考。

如果唔想煩嘅，店家亦設計好5款預設好嘅沙律款式，定價$77-$108，睇見啲配搭都好特別。

此外，亦提供多款健康飲品，如冷壓混合果汁、沙冰、特色梳打……等等，仲有意式咖啡供應添。

不得不講，店員除好有禮貌之外，將食物包裝得好細心，飲品額外加個紙托去固定佢，一定唔會倒瀉，又將紙袋打上釘書釘，令裡面嘅食物更穩固。

打開個包裝，都有點小驚喜喎，原來送咗粒Comvita品牌嘅嘅檸蜜糖俾我，即喺用上麥蘆卡蜂蜜做嘅糖，當然喺好嘢嚟啦。

Dragon Fruit Smoothie $68

由於紅火龍果比較少飲，又知道佢營養價值高，食療功效強，所以，專登揀咗呢一款以紅火龍果、香蕉、燕麥奶打成嘅沙冰，色澤艷紅，仲睇到好多果肉纖維，就知真材實料無欺場；入口冰涼清爽，而且果味濃郁，可能加咗少少燕麥奶，口感柔滑，絲毫無冰粒感。

My Own Salad (Avocado, Crabmeat, Roasted Pumpkins) $95

自己DIY組合好處就梗喺可以只揀自己最喜愛嘅食材配搭啦，所以，揀咗最心水嘅牛油果、蟹肉、烤南瓜，雖然，餐牌就話只可以揀一款菜及一款醬汁，但店員都好好人，俾我揀到兩款，故菜底就揀羅馬生菜同火箭菜，醬汁要咗芒果醋同松露乳酪醬。唔喺講笑，睇住店員堆吓堆吓一大碗，可謂份量十足，3款配料亦好足秤，但最緊要喺啲食材夠新鮮，沙律菜清新爽脆，牛油果好綿滑，蟹肉非常鹹鮮，烤南瓜清甜爽口，再者，芒果醋同松露乳酪醬都各具特色，混埋一齊亦產生出化學作用。