Oink Square Coffee & Crêpe：「胖」你同行

又喺星期三嘅外賣系列，因為星期三老婆都較忙、較多嘢要處理，所以，通常呢一晚都要做「無飯」夫妻，雖然，開放番晚市堂食，佢都未喺咁安心出去食，所以，都喺仍然買外賣居多。今次就試吓晌佐敦嘅外賣咖啡店「Oink Saur2 Coffee & Crêpe 」，試試佢哋嘅韓式肥嘟嘟三文治。

小店正正開晌街角，所以，一眼就睇到，而地方有幾大，亦一眼睇晒，以潔白嘅白色為主調，簡潔明亮。

餐牌底面兩頁，食物方面，主打就喺肥嘟嘟三文治，口款式非常之多，一共有成14款，以及可麗餅，亦有5款口味，都喺即點即做，仲提供多款小食添；而飲品好多元化，除鋪前凍櫃嘅罐裝飲品之外，仲有咖啡、鮮奶特飲、沙冰、梳打……等等，就算唔買嘢食，晌熱天飲杯鮮果沙冰都夠爽啦。

最後，選上兩份三文治，加一款小飲，再配兩杯飲品，成為我哋非常豐富嘅晚餐。如果有留意到，忌廉薯餅嘅膠盒專登鎅開咗透氣，唔會被焗腍。

日式蟹肉忌廉薯餅 $28

一客有3大件，都算抵食，炸得靚仔金黃，最緊要喺入口唔油膩，而且，外層既薄又鬆脆，咔嚓應聲裂開，裡面嘅薯蓉好軟滑，當然，廿零蚊有3件就好抱太多期望有好多蟹肉啦。

芥末蟹柳肥嘟嘟三文治 $40

唔止得蟹柳，每份三文治嘅標明包括有蕃茄、生菜、紫椰菜同芝士，再拌以秘製醬汁，亦喺靈魂所在，睇相都見好多料，撐到真真正正嘅肥嘟嘟。講明芥末，堅有少少攻鼻架，但配以大量生菜及紫椰菜，感覺又好清爽喎，此外，裡面有非常多蟹柳，個蜜糖芥末汁底亦甘香好食，老婆大讚話正呀喂！

泡菜五花肉肥嘟嘟三文治 $42

款式眾多，真喺幾唔容易先揀到一款，泡菜配五花肉，感覺喺最韓式架啦，同樣三文治內已配有蕃茄、生菜、紫椰菜同芝士，一樣撐到漲卜卜。因為加咗咁多配料，所以，咬落去唔會話好辣，但泡菜卻帶出濃郁惹味感，五花肉本身應該幾肥吓，但食落又真喺唔覺喎，泡菜五花肉做三文治，確喺有啲驚喜。

雙重朱古力鮮奶特飲 $32

老婆一向有飲開唂咕，所以，一般嘅朱古力佢就嫌唔喺濃香，而呢杯雙重朱古力勁啱佢囉，一來朱古力味超濃郁，仲帶少少甘苦，二來以做鮮奶咖啡嘅技巧嚟做，加入綿密嘅奶泡，故口感非常細緻柔滑。

荔枝梳打 $34

通常啲梳打都喺搵糖水溝出嚟，但餐牌標明喺新鮮水果製造，單喺呢份誠意就要加分啦，入口好清爽，滲出陣陣清甜嘅荔枝香味，又唔會有種過份嘅死甜感，更以兩大粒荔枝做裝飾，襯個泡菜五花肉三文治，絕對喺最佳配搭。

雖然唔喺第一次食韓式三文治，但一樣有驚喜，而且，幾款食物都甚具質素，用料不賴，值得翻兜。

個人評分
味道：9/10
環境：7/10
服務：8/10
抵食：9/10
平均每人消費：HK$88

餐廳資料：
Oink Square Coffee & Crêpe
佐敦德興街1號地下B2號舖
5915 0813