吉祥冰室：各有所「祥」

行咗幾次近市區啲嘅山，今回入嚟新界西行吓啲中長途嘅，由掃管笏起步，經千島湖，再經黃泥墩水塘落番去大棠村，最後坐番K車出朗屏。嚟到朗屏，差唔多5:00pm，最後搵個舒服嘅地方抖抖，嘆番個下午茶就最好不過。我哋就好隨心，見到呢間「吉祥冰室 」就入咗去，近地鐵站，純粹就腳。

除咗門口挨窗有幾張吧位枱之外，裡面嘅環境都如大部分茶記咁，裝修簡潔，左右喺卡位，中間就方枱，前者喺梳化椅，又闊落，當然好坐啲，後者無得挨，坐得無咗舒服。我哋嚟到時，啱啱好有卡位！

店家嘅下午茶餐供應嘅時間都幾長，由2:00pm到6:00pm，早食晚飯嘅人大可到6:00pm嚟最後衝刺慳少少食個下午茶當晚餐。而選擇亦非常之多，由A-Z共26款，輕怡到大份量，平平哋到貴貴哋都有。

餐具、餐紙放晌枱側，排列整齊，值得一讚，而枱上放咗少少調味料同牙簽，其實喺正常不過，但個器皿就好中式，好復古。順帶一提，店員都喺啲後生仔女，但好好禮貌，亦快手快腳，用平板落單，都幾有管理系統。

美式長熱狗 $29

啱啱賣晒菠蘿油，退二求其次揀熱狗，因為晏啲又話食晚飯喇，所以，揀款熱狗應該差唔多。有少少驚喜喎，唔喺得條腸加啲芥辣咁，長熱狗包烘過嚟，香腸有半呎長，除了青瓜片及蕃茄片，更加入酸青瓜醬，食起嚟酸爽開胃，而香腸亦非平價溝粉貨色，算夠誠意。

凍奶茶 +$3

小弟平時晌茶記就一定飲熱奶茶，但今日外間真喺超熱，熱到溶呀，所以，改飲凍嘅，本身茶底好，所以，入口茶香醇厚，冰爽濃郁嘅茶味，就算凍嘅都嗒到餘韻。

家家茶記做嘅沙嗲牛肉包呀、熱狗呀都有自己嘅賣點，正所謂各有所長。食咗件有誠意嘅熱狗，飲咗杯認真唔錯嘅凍奶茶，冰室真喺行完山嘅至好落腳點。

個人評分
味道：8/10
環境：7/10
服務：8/10
抵食：9/10
平均每人消費：HK$32

餐廳資料：
吉祥冰室
元朗俊賢坊15號權益大樓地鋪
2889 0319