初頭喺門面望落去以為喺得眼前咁大，入咗去轉右原來仲有另一片用餐區，呢邊就感覺好唔同，燈光幽暗啲，比較有氣氛啲。
晏晝嚟就梗喺食午餐啦，午市時段就有「午餐」及「早午餐」供應，其實，兩者都喺一樣，包餐湯或沙律，以及基本餐飲，再以主菜定價，可以加$20試埋是日甜品，而主菜嘅選擇都幾多元化，啱晒諸多要求嘅人。
如果午餐嘅菜式完全唔啱口味，無問題，店家亦提供散點餐，且有好多店家嘅招牌菜式，不過，逐樣計點都比叫午餐貴啦。
飲品方面，除汽水、果汁、啡茶之外，仲供應唔同嘅酒品，以及多款雞尾酒特飲。不過，打算食個午餐啫，無諗住豪食，餐飲都喺揀番基本嘢。
是日餐湯 餐湯喺椰菜花忌廉湯，大大碗嘅忌廉湯，就算半滿都仲喺叫好大碗，我就無試，聽朋友講唔錯，推得好滑溜，都幾重忌廉味。反而，亮點喺伴有一片熱烘烘嘅酸種麵包，香脆而富麥香。
是日沙律 雖然是日沙律喺煙鴨胸沙律，不過，有別平常所見煙鴨胸切成一片片，而喺切絲，加埋一啲青瓜粒、沙律菜及車厘茄，簡單清新，食得出啲食材都好新鮮，為今次午餐小聚有個好開始。
烤牛肉芝士餡餅 $138 估唔到午餐選擇中有一款墨西哥嘢，所以，友人就好想試。整體嚟講，都幾有睇頭，一客有4件墨西哥餡餅，再伴有雜菜沙律、薯條 ，佐以牛油果醬，而薄薄嘅餡餅烘得外層有少少焦脆，內層就帶少少煙韌感，而裡面除有烤牛肉、芝士，仲有墨西哥辣椒、洋蔥，頗為惹味，所以，食味真喺唔錯。
醬燒豬肋骨 $178 餐廳以「豬」為名，點都要叫一客豬肉菜式，就以豬肋骨喺大家嘅共同喜好。大大件嘅豬肋骨，塗上大量自家製烤醬，酸酸甜甜勁惹味，重點喺件肋骨做得鬆化且入味，大家都讚好。此外，除薯條，伴有牛油粟米、椰菜沙律，前者嘅栗米粒好清甜，卻極有牛油香，而後者味道酸爽，正好用嚟平衡番肋骨嘅濃重味道。
燒精選肉眼扒 $238 同枱兩個麻甩佬，都算喺喜歡食肉，所以，第3道主菜就揀肉眼扒伴紅酒汁，要咗五乘熟。燒到一條條縱橫交錯嘅炭火坑紋，已經喺極具吸引，單喺落刀嗰下，已感受到件肉眼有幾高質，入口果然非常腍滑，肉味濃郁，而且，燒得啱啱好，裡面嘅色澤仲帶嫩粉紅，卻無絲毫血水，咬落甚富肉汁，超水準出品。
至於伴菜，專登開一段講講，3款主菜嘅伴菜都配搭唔同，唔會千篇一律，而呢個肉眼扒嘅伴菜喺烤茄、法邊豆同薯條，每樣都處理過，例如烤過、炒過，而薯條都有少少特別，除炸得香脆不膩之外，好似仲喺先撲咗層麵粉先再炸，食落感覺喺有少少唔同，食到尾都仲喺咁脆。
是日甜品 +$20 見只喺加廿蚊，就不妨試一試，而款式喺美式芝士蛋糕，雖然只喺細細件，兩口就食晒，但做得有水準。除咗底層嘅消化餅碎夠薄之外，上層嘅忌廉芝士餡都夠挺身，卻好軟滑，芝士味好突出，加上少少草莓醬同朱古力醬嘅唧花，俾廿蚊都喺抵嘅。
熱咖啡 上次就有補錢轉啲特色咖啡，但感覺一般般，所以，今次就只揀番一般熱咖啡，反而仲好，因為始終喺即磨貨色，豆靚嘅話都唔差得去邊，飲落確喺幾醇香。
今餐大家都食得好滿足，一來環境幾舒服，客人唔多，我哋又可以靜靜哋傾吓偈；二來3道主菜都確喺做得有水準，貨真價實，絕無欺場；再者服務亦好唔錯，知道我哋喺共享主菜，就自動奉上額外餐碟、餐具。
個人評分
味道：9 /10
環境：9 /10
服務：8 /10
抵食：8 /10
平均每人消費：HK$200
味道：9 /10
環境：9 /10
服務：8 /10
抵食：8 /10
平均每人消費：HK$200
餐廳資料：
The Salted Pig
葵芳興芳路223號新都會廣場5樓531及540號舖
2386 1055
The Salted Pig
葵芳興芳路223號新都會廣場5樓531及540號舖
2386 1055
沒有留言:
發佈留言