Coti：閒逸咖啡小店

星期六又喺行山日，其實有少少即興，因為之前睇天文台預測話今日朝早有雷暴，午後間中有陽光，但一朝起身就已經陽光普照，萬里無雲咁款，所以，立即睇吓有無老友有興趣行山，結果，就約好舊同學，簡單行一轉「元荃古道」，由荃灣行到深井。起步前，就不如約埋食番餐晏仔先起步，唔想太普通，就揀咗荃灣「嘉達環球中心」嘅Coti，方便食完行上去起步點。

餐廳位處商業中心大堂，鋪仔細細，主力做咖啡，明顯客戶就喺樓上嘅寫字樓客，佢哋消費力高，肯花錢飲啲靚咖啡或特別咖啡。而餐廳嘅環境基本上晌門口都一眼睇得晒，裝修簡約，一派咖啡小店模式。

最吸引小弟喺近水吧位前嘅「Coffee Type」海報，一圖睇晒咁多款意式咖啡嘅分別。

既然喺主打咖啡，當然先介紹飲品一環，除各種經典嘅意式咖啡之外，仲有多款特色推薦咖啡、花茶、鮮奶、朱古力、果茶……等等。

食物方面，店家主力喺做早餐及午餐，各方面都提供多款選擇，並包埋餐牌內任何咖啡或茶類飲品，喺只有轉推薦咖啡先要加錢。啲咖啡、花茶散點一般三、四十蚊杯，所以，咁計落啲早餐、午餐其實唔貴。

未來肉醬意粉 $74

舊同學喺食肉獸，完全唔知咩喺未來肉，所以，推薦佢試吓，睇吓佢覺得似唔似真肉。睇賣相就真喺跟一般肉醬意粉無分別，最正仲喺灑滿巴馬臣芝士，而入口，老友話真喺分唔到真肉定素肉，好有驚喜，而且，啲意粉又煮得極具咬口，每條粉都掛滿醬汁，好食，只喺嫌肉醬少咗啲啫。

慢煮帶骨赤雞腿配飯 $88

小弟就睇啱呢一款慢煮菜式，加上餐牌仲標明喺用上鹿兒島雞髀，感覺好似好勁。賣相其實就好簡單，喺好一般雞髀碟頭飯嘅樣，不過，隻雞髀肉就真喺好嫩滑，煎得外皮又帶點焦脆，食得出用料不賴。

鮮奶咖啡

既然喺咖啡店就點可以錯過啲意式咖啡，而鮮奶咖啡喺小弟首選。單喺睇拉花，已知道質素有番咁上下，拉花花紋細紋，表面又好平滑。呷一口，咖啡嘅醇香完全散發晒出嚟，仲帶有少少果仁香，而完全無攪過之下，每一口口感都好均勻，沖泡嘅手勢非常好。

天然蜂巢咖啡 +$24

另一杯咖啡亦出色，咖啡師打咗一大杯奶泡，仲伴上一小杯濃縮咖啡及一大匙羹蜂巢蜂蜜，放埋一齊非常有睇頭，店員話將三者加埋一齊就可以。舊同學大讚好飲，仲好有驚喜，因為，蜂蜜嘅天然甜甜令咖啡更醇香，再者，啲豆靚，沖出嚟嘅咖啡都高質啲。

雖然只喺簡單兩個主食，兩杯咖啡，但都食得稱心，份量啱啱好，唔會太飽，輕鬆食完就起行。

個人評分
味道：8/10
環境：7/10
服務：8/10
抵食：8/10
平均每人消費：HK$93

餐廳資料：
Coti
荃灣沙咀道6號嘉達環球中心地舖
2554 0618