澳洲仔 Foodporn：「墨」有所值

早前晌「葵廣」買外賣，無意中就留意到呢一家主打賣墨西哥食物嘅「澳洲仔」（唔知點解唔喺墨西哥仔？），墨西哥嘅餡餅（Taco）一向都幾啱口味，過往都到訪過好幾間墨西哥餐廳，雖則唔多，但都一定會點餡餅，所以，趁今次又過開嚟「新都會」，故就晌「澳洲仔」度買外賣拎返屋企食。

睇睇餐牌先，好簡單，主要喺3類菜式：墨西哥餡餅（軟皮、脆皮、鴛鴦皮）、墨西哥雞肉卷及粟米片，再選唔同食材口味及醬汁，為起嚟每樣嘢三四十蚊，以墨西哥嘢而言，都算相宜。

更有啲店長推介嘅選項，唔想諗，就不妨晌呢款中去下決定。

簡簡單單，買咗一客墨西哥餡餅及一客墨西哥雞肉卷返去當午餐。由於所有食物都喺即叫即做，所以，都要等一段時間先有，而店員會吩咐你大概幾耐可以返嚟攞，可以趁機晌同一層打個團，搵搵下次可以試邊間。順帶一提，袋食物喺用上紙袋，而食物包裝盒亦用上紙盒，都喺可以循環再做，較為環保。

脆皮牛肋條蒜香汁墨西哥餡餅 $38

唔講得笑，牛肋條肉多到爆，睇相都睇得到，而且，仲唧滿醬汁，加上墊咗張紅白格仔紙，真喺睇見都好吸引。雖然拎到返屋企會打少少折扣，但入口都仲喺暖暖哋，咬落餅皮仍然脆口，而啲牛肋條肉煮得又腍又入味，肉味亦夠突出，肉質鬆化，配蒜香汁，就更加惹味。

墨西哥雞肉卷 $43

另一款經典嘅墨西哥食物就喺傳統嘅雞肉卷，以軟皮包住烤雞肉、生菜及蕃茄，捲得紮實，所以，拎上手感覺喺非常墜手，好夠份量。外皮都烤過嚟，口感煙煙韌韌，帶少少焦香，烤雞肉既嫩滑，又多汁，夾埋啲蔬菜，又變得好清爽。

「澳洲仔」只賣食品，無兼售飲品，不過，既然拎返屋企食，就配飲乜都得啦，最夾都喺配罐汽水囉！

個人評分
味道：9/10
環境：6/10
服務：8/10
抵食：8/10
平均每人消費：HK$40

餐廳資料：
澳洲仔 Foodporn

葵芳葵富路7號葵涌廣場1樓B01A號舖