傅記茶餐廳 Fu Kee Restaurant：不「傅」眾望

之前一篇食文講到同舊同學見天氣好轉，即興簡單行一轉「元荃古道」，由荃灣行到深井，起步前就問荃灣食個晏，行完出身大汗，就晌深井食個下午茶。今次就揀番晌出面大街嗰幾檔，最後選上「傅記」，無特別原因，隨心而已。

始終天氣都比較熱，今日行山嘅人唔多，就算嚟到「傳記」，食下午茶嘅客人亦唔多。村屋鋪，所以鋪前架起大型帳篷，雖然有啲冷風機，但都幾悶熱吓，故坐嘅人唔多。

我哋就揀坐入面實鋪，皆因有強勁嘅冷氣，涼快好多，尤其啱啱行完山添。而內裡格局如一般茶記，鋪仔細細，一邊喺水吧加廚房，另一邊就有幾張卡位，最好喺啲卡位之間用啲大膠膜隔開晒，夠晒防疫效果。

老規矩，枱上放有餐紙及基本嘅調味料，而枱側嘅抽櫃就喺各種餐具。

本來都影咗啲餐牌相，臨走時見到門口有啲單張拎，就索性拎嚟再掃描出嚟俾大家當個參考。講得喺茶記，啲定價都喺好相宜，就好似我哋叫嘅茶餐，都喺市價30零蚊，碟頭嘢4、50左近，小菜套餐就劃一$66。深井出名喺燒鵝，茶餐都有燒鵝瀨，不過，輕盈少少，食個包就夠晒。

沙嗲牛肉脆脆豬仔包餐 $35

平常無菠蘿油，就會揀沙嗲牛肉包，而呢度，就升級少少用脆豬。有相你睇，啲沙嗲牛肉真喺塞到爆晒餡，揭開個包補多張相，無花無假堆到滿滿，沙嗲味香濃十足，牛肉軟腍鬆化，配上熱烘烘嘅脆豬，外脆內軟，正呀喂！

熱奶茶

因為內鋪冷氣夠，行山時又補足水，所以，點杯心水嘅熱奶茶都OK。去茶記飲餐飲奶茶喺小弟嘅必然之選，亦喺最穩膽嘅選擇。不過，杯奶茶雖講唔上超高質，但茶底唔錯，幽香醇厚，口感亦不俗。

雞扒脆脆豬仔包餐 $35

舊同學都喺揀脆豬，不過就配雞扒，而雞扒又喺交足貨，對比之下，雞扒有個包咁大，打橫補多張相，就見唔止大，仲好厚身，想食得輕盈啲都唔得，哈哈！雞扒醃得入味，又煎得皮脆肉嫩，夾脆豬，舊同樣大讚一流。

凍檸茶 +$3

舊同學話凍檸茶喺本土特色，晌其他地方飲檸茶真喺唔及香港嘅好，當然呢個喺較主觀嘅感覺，不過，茶記嘅茶底沖泡得好，所以，出嚟嘅檸茶喺有啲唔同，加上夠檸檬，飲落真喺冰涼酸爽，配濃味嘅雞扒脆豬，確喺上佳組合。

嘆嘆冷氣，食個茶餐，真喺爽晒，而兩款脆豬都不負眾望，當然，嚟得茶記，幾十蚊貨仔，環境及服務（普遍而言）就唔好有咩期望啦。加上今日條路線好行，唔太長，又唔太短，兼有靚景！

個人評分
味道：9/10
環境：6/10
服務：6/10
抵食：8/10
平均每人消費：HK$35

餐廳資料：
傅記茶餐廳 Fu Kee Restaurant
深井深井村路56號地下
2491 8002