炯記餐室 Gwing Kee Restaurant：「油」然自得

都好耐無約表哥聚一聚，所以，趁今日假期就約咗佢食餐晏晝，地點就番佢晌長沙灣一帶。早前睇過食友對「炯記餐室」嘅分享，主打喺招牌鵝油撈麵，覺得既有特色，又唔算貴，所以，就定晌嚟「炯記」。

無論鋪面，抑或內籠、餐枱、餐椅，都喺以白色為主調，再配襯少少淺木色系，簡約清爽得嚟有少少雅致，加埋啲吊燈，帶少少日系和風。而樓底比較高，座位嘅編排亦唔算好密，所以，空間感都算十足。

嚟食晏，就介紹午餐餐牌先，選擇唔多，定價四、五十蚊，包是日例湯或熱飲，但可以加錢轉其他飲品。不過，無我哋嘅心水選項，所以，都喺晌番主餐廳落手。

其實主餐牌嘅嘢都唔喺貴，一般而言，五、六十都已有交易，同樣，包是日例湯或熱飲，加錢轉其他飲品，亦提供好多加配優惠。但喺，選擇就多好多，例如一系列招牌太子鵝油撈麵、全日早餐、炯記風味食品、燒味系列、香滑炒蛋飯餐、咖喱飯餐、特色牛角包、多款小食……等等，部份食物更有圖片作參考。

飲品方面，茶記慣見嘅自然都有，另外，就有唔少特飲，有啲款式都幾有賣點，值得補少少錢試試。由於餐廳都以茶記模式經營，所以，唔收加一服務費，就算喺咁，店員嘅服務都好唔錯，上菜亦快。

清湯牛魔王撈麵 $60

我哋目標一致，都喺鵝油撈麵，而表哥就揀咗牛魔王，即喺牛腩配牛肚，雖然我哋各自叫，但餸料都「些牙」嚟食。兩者都煮得唔錯，牛腩炆得好鬆化，而牛肚爽腍，表哥都讚唔錯。

番石榴四季春烏龍茶 +$10

見改配特飲都喺加$10，加上呢一款凍飲配搭幾特別，所以，就試試佢。佢話入口確有茶香，帶微微番石榴酸香，感覺清爽，又唔太甜，夏天飲，搭鵝油撈麵幾襯。

秘製醬皇豬手撈麵 $56

小弟就揀醬皇豬手，因為近來豬手較少食，除咗豬手，個餐仲伴有一小碟蒜香黑木耳，入口非常爽脆，而豬手炆得極之入味，可謂火候十足，皮下骨膠原強勁，咬落有少少啜口感。鵝油撈麵算喺第二次食，雖叫鵝油，但食落唔會「油淋淋」，反而，喺有份油香，「脂」味無窮，仲有，啲麵量超多。

黑糖紅豆奶茶 +$10

黑糖、奶茶、紅豆冰都喺心水嘢，三者放埋一齊，真喺無乜理由唔嗌。飲落，茶味OK嘅，亦飲到陣陣黑糖嘅清甜，紅豆比較細粒，幸而都煮得幾綿，唯一挑剔喺整體有少少偏甜啫。

兩老表食吓嘢，吹吓水，尤其早排疫情咁嚴峻，一大班親友都無乜機會見面，今餐簡簡單單，食得悠然自得。

個人評分
味道：8/10
環境：7/10
服務：8/10
抵食：8/10
平均每人消費：HK$68

餐廳資料：
炯記餐室 Gwing Kee Restaurant
地址：長沙灣元州街303號元州商場地下G07號舖
電話：3565 5488