點心到 Dim Sum Here：「心」得我心

依家飲茶食點心梗喺無時間限制啦，梗一包晌屋企，再唔喺，便利店大把即食點心，當然，想有質素少少，梗喺去啲點心專門店啦，況且，依家真喺開到梗有一間晌左近。近來疫情叫緩和咗，但都未喺可以掉以輕心，故此約食飯都只喺約番啲相熟嘅老友。今回同友人嚟到「點心到」飲餐夜茶，仲揀早少少避咗晚市，快上快落食完就閃。

餐廳裝修簡約，木地板、木枱椅，特色嘅吊燈，予人感覺光猛潔淨，主要都喺四人枱，不過放咗唔少隔板鎅為兩張二人枱。此時都喺兩、三乘客，所以，大家都各自走位，坐得隔開啲。

枱上已放好餐具、洗碗兜、一大壺熱茶，自己招呼自己。而茶位收$3位，唔算貴，不過，點心紙顯示有飲品提供，不過，就唔知嗌咗飲品，茶位有無得豁免啫。

一張點心紙底面兩版，就羅列晒所有點心款式，大部分會喺見慣見熟嘅款式，數數吓，原來都有成50款之多，睇落定價都算相宜。嚟點心專門店最划算喺唔收加一，慳番嘅加一真喺夠食多一款點心。

晶瑩鮮蝦餃（2粒）$15

蝦餃同燒賣最好喺可以嗌半份，蝦餃喺點心嘅經典，點都要叫番一客。外皮摺紋清晰，薄透晶瑩，而且，咬落唔黏牙，裡面塞滿蝦肉，重點喺啲蝦肉非常鮮爽彈牙，有水準。

原隻蝦燒賣（2粒）$15

仲記得以前燒賣嘅升級版喺加啲蟹籽上面，已經靚仔咗好多，依家仲加晒原隻蝦，又再升一級，兼且爽彈為整粒燒賣加分。而中間嘅豬肉餡打得爽身，亦食得出無溝粉，有豬肉嘅鮮味，真材實料。

醬皇金錢肚 $24

金錢肚又喺點心中另一經典，唔喺鳳爪就金錢肚架喇。金錢肚軟腍帶點點爽口，非常入味，充滿柱候醬香，下面就例牌墊咗少少蘿蔔，索晒汁，同樣惹味，而且，嫩滑無渣。

黑金流沙包 $25

無論叉燒包、奶皇包、抑或流沙包……熱焫焫嘅蒸包就特別好食。個流沙包拎上手已感受到非常軟熟，咬一口啲流沙餡已澎湃湧出嚟，帶點鹹鹹嘅蛋黃香，確喺好食，不愧喺推薦嘅點心之一。

蜜汁叉燒腸 $25

無嗌叉燒包，就嗌番碟叉燒腸。腸粉加多炷菜俾客，都幾搞嘢，雖然啲腸粉皮睇落就未至於話薄到透光，但拉得都算嫩滑，亦有米香，而裡面嘅叉燒就落得無手緊，件件都塞滿瘦叉，啱我口味。

普遍上，點心嘅定價比去酒樓平，款式亦算多，雖然無話搞好多古靈精怪、好花巧嘅菜式，但師傅嘅功夫都算紮實，質素都叫穩定。服務亦唔錯，啲店員頗有禮貌，亦好勤快幫忙收籠收碟。

個人評分
味道：8/10
環境：7/10
服務：8/10
抵食：8/10
平均每人消費：HK$55

餐廳資料：
點心到 Dim Sum Here
佐敦廟街286-298號華志大廈地下6-8號舖
5423 7079