小火焰韓式咖啡餐廳 Aidan Café：絕佳體「焰」

今周六就唔行山，改咗同老友踩車，因為天氣開始熱番，所以，唔好太搏，輕鬆啲，由太和一直踩去大圍，咁樣無咁辛苦。嚟到大圍，午飯時段過咗，搵食都無咁多人，老友話搵間餐廳好坐啲，打打躉，抖一抖。即時晌網上搜查吓，搵到呢間「小火焰」，來好耐無食過韓國嘢，二來見佢嘅風評不俗，幾多好評，應該值搏率高。

走入餐廳內，地方呈L形，話大唔大，話細唔細，以啡色、杏色為主調，裝修都幾骨子，牆上嘅電視機不斷播放K-Pop。枱上已放好餐具同餐紙，消毒噴霧，其他基本嘅間隔膠板、防疫要求都算做足。

佢哋嘅食物選擇非常之多，雖然只喺午餐，但唔喺得三幾款，石鍋料理、韓式拌飯、大醬湯粉絲鍋、烏冬、焗飯……等等，大部份定價都喺五、六十左右，包餐飲，唔收加一。最好喺有好多彈性，轉其他飲品，加配小食，均有優惠，仲要喺可以一次加配多款小食都得。

而呢度，用二維碼落單，落單時發覺彈性仲大，好似飯可選多飯、少飯，飲品可以揀少甜、少冰，友人嘅烏冬可由原先嘅蕃茄湯底轉為豬骨湯底。唔熟二維碼落單都唔緊要，店家備有紙仔俾客人填。

甜辣韓式炸雞 +$12

有加配優惠就當然少少哋試番一客小食，一客炸雞有3件，炸得甘香可口，又唔油膩，啲肉質又幾嫩滑，淋上少少韓式甜辣醬，更加惹味好食，個加配價真喺抵食。若非仲要踩番轉頭，唔方便食太飽，否則真喺想加配多一、兩款小食呀！

酥脆蘑菇雞翼蕃茄湯烏冬 $68

老友想食啲濕濕哋嘅主食，本來諗全試水冷麵，最後都喺改番食蕃茄湯烏冬，因為貪其食落開胃啲。佢話最欣賞喺雞翼同湯烏冬分開上，唔會被浸腍，所以，啲雞翼入口真喺非常酥脆，裡面仲釀入芝士蘑菇，超好食；而烏冬夠晒滑溜，個蕃茄湯亦做得不賴，酸酸香香確喺醒胃。

甜薯咖喱燒牛扒飯 $68

小弟就想食吓咖喱，個咖喱飯都幾靚仔，伴有一隻燶邊蛋，蛋黃香滑綿綿，而牛扒燒到有啲焦香，肉味濃，而咖喱就較日式嘅做法，帶少少甜味，咖喱撈飯就幾時都咁好食，再者，啲飯煮得飯粒分明，加埋啲日本細細粒嘅甜薯，食完真喺滿足晒。

凍蜂蜜柚子茶 +$3

老友簡單啲，要杯冰凍嘅蜂蜜柚子茶解解渴就可以喇，佢為人無太多要求，不過，佢都話杯`蜂蜜柚子茶入口好清潤，柚子味亦好香，就算喺啲即沖貨色，都俾足料。

凍岩鹽焦糖咖啡 +$13

我就喜歡嘆咖啡多啲，不過，同樣因為天氣熱，都改飲杯凍嘅，岩鹽焦糖口味就最合心水，唧咗少少忌廉，再加啲啲粟米片做裝飾，賣相好睇好多。入口冰涼爽快，拌勻晒之後，口感柔滑，咖啡嘅醇香中滲出焦糖嘅香甜味，正呀！

3.6牛乳奶凍 +$10

我見個奶凍只喺加$10，真喺出去晌啲甜品店單買都唔得，所以，當然要試一試。樽仔造型，而且，份量好足，無話將貨就價，但最緊要喺個奶凍口感好軟滑，牛乳味好濃郁，絕對交足貨，仲要加配價咁平。當然，如果面頭加多一小撮紅豆，就真喺錦上添花。

難得餐廳內人唔多，環境又唔錯，所以，我哋都坐耐少少攤抖吓，之後先再慢慢踩回程返太和！

個人評分
味道：8/10
環境：8/10
服務：8/10
抵食：9/10
平均每人消費：HK$87

餐廳資料：
小火焰韓式咖啡餐廳 Aidan Café
大圍大圍道1-35號金山樓地下4號舖
3170 2320