自港島延線開通，西區一帶多咗好多特別食店，睇店名都知店家嘅顧客對象喺外國人居多，不過，今晚所見嘅反而喺本地人。餐廳地方唔大，近門口一排對街窗口位，望入去左邊喺開放式廚房，右邊喺一排排高腳櫈用餐區，裝修幾有特色，陳設唔少鐵絲網，帶點工業風，氣氛卻喺好休閒。
而全場焦點，相信喺餐廳尾嘅大型凍櫃，直頭搬咗便利店嘅凍櫃過嚟咁，放滿一支支果汁、汽水、梳打水、手工啤，款式方面林林總總，無一百，都有六、七十款，而每一支飲品都已標清楚價錢，由客人自取，店員會幫你計數。
芒果汁、熱情果汁 @$18 「Compal」呢個葡萄牙品牌嘅果汁算喺試過一次，印象唔錯，既然唔飲酒，就再試番呢一款果汁。上次就喺試熱情果，所以，推介俾老友，而小弟自己就揀咗芒果，呢個品牌嘅果汁賣點喺新鮮水果製造兼無添加，所以，支芒果汁飲落真喺幾香甜，芒果味好濃郁，質感又唔會好水，感覺有種堅由果肉鮮榨出嚟。
主餐牌就得一版，分類為Grills、Surf、Sides、Snacks、Kids Menu，務求貴精不貴多。見啲菜式定價都平，所以，點咗兩客主菜之外，再加多一客小食同一客伴菜。
此外，開放式嘅廚房上面，幾塊黑版所列嘅都喺是日嘅特別推介，有興趣嘅朋友不妨留意吓。
墨西哥脆辣雞翼鎚 $68 先嚟一客雞鎚，標明一客有6隻，疊得整整齊齊幾靚仔，伴上自家製蛋黃醬。啲雞鎚啖啖肉，炸得香脆又唔油，不過，原來真喺幾辣吓，陣陣刺激感，一口雞鎚肉，一口凍果汁，又幾爽嘅。
烤香草車厘茄 $38 其實佢哋啲主菜均伴有唔少沙律菜，不過，加多一份蔬菜類伴菜，減低啲罪惡感啫。一大碟烤車厘茄，睇落平平無奇，其實非常好食，一來熱辣辣茄味濃縮，二來粒粒都爆汁，又灑上香草，份外清新。
美國安格斯平鐵牛扒 $128 老友嘅最心水選擇就喺安格斯牛扒，大大件，厚厚身嘅牛扒，烤得焦香又帶一身坑紋，外觀已好吸引，仲伴有好多薯菜，賣百鬆啲，真喺抵食。老友話件扒唔錯，好腍好滑，五乘熟做出嚟啱啱好，又香又富肉汁，佐以少少法式芥末，食味一流。
法式油封鴨腿 $128雞牛豬平常都多接觸，所以，小弟就揀油封鴨腿，呢道菜都有啲功夫架，先經過慢煮，再煎封。的確，隻鴨腿做得非常有水準，外皮酥脆香口，真喺一啲都唔油膩，而肉質極之嫩滑細緻，帶有鴨肉嘅獨有羶香，個人覺得好好食。沙律菜亦新鮮爽脆，加咗少少欖油同黑椒調味，而粗薯條亦都香脆好食。
講真，以鋸扒計，呢度定價真喺好相宜，而且氣氛輕鬆，招呼又唔錯，真喺幾適合三幾個朋友聚一聚，飲吓嘢，食吓扒。
個人評分
味道：9/10
環境：7/10
服務：8/10
抵食：9/10
平均每人消費：HK$200
味道：9/10
環境：7/10
服務：8/10
抵食：9/10
平均每人消費：HK$200
餐廳資料：
The Bottle & Steak
西環西營盤第一街5號地舖
6292 4152
The Bottle & Steak
西環西營盤第一街5號地舖
6292 4152
沒有留言:
發佈留言