餐廳其實都幾深，入到盡頭兩邊都有啲座位，而最神秘喺入面有一個角落，裝修成日式嘅榻榻米，絕對可以扮成偽出遊。
睇店名都知，咖啡同班戟喺主打，而呢度主要喺賣梳乎厘班戟，除此之外，食物方面都有好多選擇，如牛角包、法式吐司、意大利麵、主菜類、以及多款蛋糕；而飲品亦都非常多元化、多選擇，包括各類意式咖啡、茶品同特飲。
近門口櫃檯，仲放有一個小小餅櫃，有啲鬆餅、貝高包供應，再睇番餐牌，原來都有介紹吓，喺本地人氣麵包店Bread Elements所供應嘅烘焙產品。
牛油果蟹肉牛角包 $85 既然講到啲烘焙產品咁有來頭，就先試上一客鹹點嘅牛角包，以牛油果同蟹肉入饌，呢個組合基本上都無得輸，仲加隻太陽蛋，單喺賣相都已經好吸引。牛角包果然高質素，烘得鬆脆富牛油香，牛油果熟成夠透，蟹肉味道鹹鮮，夾埋一齊食真喺幾滋味。
海鮮煙肉意粉 $92 主食就揀咗一客意粉嚟墊墊肚，原本都諗住試個辣蕃茄蟹肉扁意粉，但牛角包揀咗轉蟹肉，意粉就選咗海鮮，事後睇番自己先前嘅食評，原本已經試過，哈哈！海鮮就包括青口、蜆肉，如果有埋大蝦或帶子一類，就更好喇。青口同大蜆入口都算鮮甜，煙肉就帶出份鹹香感，至於意粉，就煮得咬口，個人就覺得個汁底有點稀，收番厚身啲就一流喇。
提拉米蘇梳乎厘班戟 $128 嚟得呢度，點可以錯過梳乎厘班戟吖，一客有成3大件梳乎厘班戟，再加上正宗手指餅做嘅提拉米蘇，外觀已經好有睇頭。先講啲梳乎厘班戟部份，煎烘得鬆軟綿綿，空氣感強，微微濕潤，極有蛋香；而手指餅浸透晒咖啡，濕潤可口，忌廉亦打得輕盈不膩，不過，如果加入番馬卡風芝士打成嘅忌廉，相信更傳神。
伯爵茶鮮奶咖啡 $42甜點就梗喺搵杯咖啡嚟襯一襯，而咖啡中就以鮮奶咖啡喺最心水，雖然杯伯爵茶鮮奶咖啡嘅拉花就欠奉，但沖泡得都唔錯，奶泡撞入去咖啡中都好均勻，入口柔滑，醇香嘅咖啡味中滲出清幽嘅伯爵茶香，感覺好平衡，唔似港式鴛鴦咁霸道。
豆花咖啡 $52老友絕對喺出於好奇先揀呢一杯咖啡，送到上嚟，真喺有一杯豆漿加豆乳布甸，仲加咗少少黃糖添，另配一小罌濃縮咖啡，再自行將兩者混合。飲落，佢話出奇地無違和感，而且，都幾夾，大抵可以想像喺咖啡倒入豆奶，以取代牛奶而已。
再次到訪，食物嘅水準依然保持到，尤其份梳乎厘班戟，製作手勢無生疏，真喺無咩挑剔位，加上環境唔錯，幾舒服，店員嘅招呼又好，周末嚟嘆吓，確喺幾賞心樂事。
個人評分
味道：8/10
環境：8/10
服務：8/10
抵食：8/10
平均每人消費：HK$220
味道：8/10
環境：8/10
服務：8/10
抵食：8/10
平均每人消費：HK$220
餐廳資料：
PHI Coffee & Pancake
美孚百老匯街69-119號美孚新邨地下91A號舖
2887 6728
PHI Coffee & Pancake
美孚百老匯街69-119號美孚新邨地下91A號舖
2887 6728
沒有留言:
發佈留言