翠河餐廳 Green River Restaurant：行山後嘅樂「翠」

正所謂放假先嚟打風，行山先嚟落雨，今日約咗啲朋友由城門水塘起步，經下城門水塘落到大圍。朝早啲天氣都OK，但起步無耐，就起變化，好彩都喺灑幾陣大雨，好快又收番，只喺少少影響行程。到達大圍後，由「沙田友」帶我哋嚟到美林嘅「翠河」食個下午茶補補體力。 

自從美孚嘅「翠河」摺咗，都好耐無幫襯過呢間連鎖茶記。入到呢間翠河，燈光幽暗少少，比一般茶記嘅光光猛猛，算喺叫有啲「氣氛」，全場都喺啲皮椅，叫坐得舒服。

下午茶餐分兩大類：輕量級及重量級，數數埋埋有近30款，定價都好相宜，不過，好少屋邨嘅茶記，晌下午茶時段得咁少客。

沙嗲牛肉包 $30

本來就想揀菠蘿油，不過睇睇價錢，菠蘿油賣29，沙嗲牛包賣30，後者性價比高啲囉。雖然隻熱狗包包身唔喺切得好深，但都叫做堆咗唔少牛肉，「黑掹掹」嘅沙嗲汁，聞都聞到好香濃，一般而言，茶記嘅沙嗲牛都衰唔得去邊，呢度都喺，啲牛肉好軟腍，充滿沙嗲香，汁底夠晒惹味，唔會太水，而個包身無翻烘，所以，扣佢少少分。

熱奶茶
沙嗲牛算喺茶記嘅名物之一，熱奶茶呢？絕對喺茶記嘅經典，晌其他類型嘅餐廳飲熱奶茶感覺都喺差少少。用厚身嘅瓦杯裝熱奶茶喺最好不過，既喺情懷，又較保溫。奶茶嘅色澤好對辦，深褐色得嚟有光澤，入口茶底醇厚，幽香得嚟有餘韻，茶、奶嘅比例亦好，味道平衡，就算口感未到絲咁幼滑，都喺一杯沖得有水準嘅奶茶。

行完山出身汗固然人都爽晒，再嘆住冷氣食番個下午茶就乜精神都返晒嚟，我哋成日講，行邊度都唔緊要，重點喺點都安排食番個下午茶，咁先喺種樂趣！後記：幫襯完無耐，老友再去食早餐時就話結咗業！

個人評分
味道：7/10
環境：7/10
服務：7/10
抵食：9/10
平均每人消費：HK$30

餐廳資料：
翠河餐廳 Green River Restaurant 

地址：大圍美田路30號美林商場1樓97號舖
電話：2362 0871