山區裡的走走趯趯: 炊豕店 Hogology：美食開「炊」

2021年3月30日星期二

炊豕店 Hogology：美食開「炊」

疫情暖和咗，趁無飯開，就約表姨甥女聚聚舊，不過，佢算喺插畫界及出版界有啲名氣嘅人，呢排佢久唔久就入咗去荔枝窩耕田，又或主持啲網上研討會，所以，約佢食餐飯都幾難。最近攝到個一日俾我，近近哋就佢，就晌佢屋企附近嘅「炊豕店」短聚食餐晚飯。

佢話呢家餐廳新開無耐，門口仲貼住紙仔試業緊，但就已經喺第三家分店，風評不俗，食物嘅水準有保證。走入餐廳內，個鋪位都幾深，枱櫈亦唔算排得密，加上樓底高，空間感都唔錯。

裝修雖然簡約，但鋪尾嘅紅磚牆，及地下嘅細格仔地磚，都有啲特色。當然，較搶眼喺牆上嘅手繪啦！

睇餐廳名，就知佢哋主打喺食炸豬扒啦，幾款秘製豬扒飯，賣$60-$64，仲有其他跟豬有關嘅飯，賣$58-$68，所有飯品可以免費轉粗麵或幼麵，更可以額外加配料或汁底。此外，仲有少少小食提供，飲品亦有優惠價加配，剔好紙仔落單，跟住店員就會送上食物，但又唔收加一喎，讚！

筷子、匙羹、醬油及辣油已放晒晌枱上，自由取用，不過，如果俾杯熱水淥吓啲餐具就更好。此外，整體嘅服務都幾好，店員有禮，亦好醒目，主動拎多隻碟俾朋友載起啲豬扒，方便食用。

秘製豬扒飯（蔥油汁）$64

唔食過飯都唔知，原來表姨甥女喺蔥油粉絲，食親燒味就勁沾蔥油，所以，二話不說就揀秘製豬扒飯配蔥油汁。唔喺講笑，啲炸豬扒堆到成座小山咁，最正喺落咗好多蔥油，絕對喺滿足晒佢嘅期望。佢就話無論啲豬扒，抑或蔥油撈飯，都好好食，食完勁飽。

秘製豬扒飯（咖喱汁）$64

早一個星期先晌一家茶記食完蔥油豬扒煎蛋飯，所以，今回老早就無打算點，反而，個人就想試試佢哋嘅咖喱。最合心意喺個咖喱汁另上，唔怕啲汁整腍啲豬扒脆漿層，而表姨甥女又可以自行試試啲汁。

我嘅豬扒無堆起嚟，一塊過橫放晌飯面，可見有幾大塊，夾起一望，非常厚身，入口外層脆而不膩，而豬扒軟熟鬆化，有肉香，好掂喎；咖喱汁底有啲日式嘅感覺，因為唔多辣，香得嚟就唔似印度嗰啲咁多香料嘅層次。而啲珍珠米亦煮得有水準，圓潤軟綿，有飯香，真喺淨撈咖喱汁都可以食晒成碗，飯量都唔好講笑，有家常飯碗嘅兩碗，如果認為自己食唔晒，不妨要少飯，可以減$1。