呢間分店裝修算簡單，無咩太多花巧裝修，而餐廳呈長形，中間有廻轉帶，一邊喺吧位，另一邊喺4人卡位，此外，最左邊亦喺卡位，我哋被安排坐晌嗰邊，感覺更好，因為除卡位前後喺高椅背加有膠板擋住，就連對開嘅通道位都設有一大塊。
餐廳嘅防疫措施都做到足，一入門口量體溫、登記，又以大膠板間開啲位，枱上仲備有消毒搓手液。 而紙巾、芥末、七味粉、醬油放晒晌枱上，自由取用。
因為好耐之前都幫襯過，都知佢哋喺用手機程式點餐，自己搞，清清楚楚，又唔怕有漏單，今日，就點咗呢堆嘢。
由於我哋唔喺坐晌廻轉位，所以，壽司就唔會逐碟上，先喺一輪5款卷物同壽司，以下就逐一分享。
牛油果軟殼蟹卷 $22 牛油果軟殼蟹喺老婆頗心水配搭嘅卷物，睇樣就做得有啲粗糙，好似表面嘅蟹籽，黐到啲就算。卷物內除有牛油果、軟殼蟹之外，仲捲住青瓜，口感甚富層次，整體食味亦算唔錯。
鱆魚燒風味香脆魷魚卷 $19 講明喺香脆魷魚卷，卷物內就真喺只有炸魷魚鬚，只喺表面有少少白芝麻同木魚碎。啲魷魚幾甘金柔韌，但有少少油，如果加入青瓜或醃蘿蔔平衡吓，效果唔知會唔會仲好啲呢！
蔥香珍寶熟帆立貝壽司 $17 （左）、炙燒黑松露帆立貝壽司 $17（右） 熟嘅就老婆食，生嘅就我食。話就話熟帆立貝，其實，都只哋半生熟，不過，配咗啲蔥粒、紫洋蔥絲，老婆過感覺幾唔錯，帆立貝都好鮮甜。而我嘅呢，話炙燒，真喺唔覺有點燒過，同生嘅無分別，仲喺好色澤晶瑩，黑松露嘅味道亦唔明顯，還好喺件帆立貝有質素。
吞拿魚壽司 $19 之前試過佢哋一款「柚子醬油吞拿魚」，印象唔錯，但今次就唔見有，不過，都點咗一客吞拿魚壽司，魚生嘅色澤紅潤，睇起嚟都幾新鮮，入口頗有魚味，而飯粒黏糯，夾起嚟又唔會好易散，再者，佢哋標明用日本產嘅米，感覺喺唔同啲。
柚子油甘魚蓉軍艦 $17 卷物、壽司都食咗，叫一客軍艦試試先，老婆對柚子情有獨鍾，故此，揀咗呢一款柚子油甘魚蓉軍艦，油甘魚刴得細碎，面頭灑咗少少七味粉，魚蓉口感綿密，入口確喺嗒到柚子嘅清香，而七味粉則令油甘魚嘅魚鮮味突出咗。
再追加多兩客壽司，今日唔知點解，點得特別多帆立貝類嘅壽司，另一款則喺芝士白蝦，兩款都喺炙燒過，喺專登點俾老婆食，唔太生嘅就啱佢多啲。
炙燒芝士白蝦壽司 $19 對比起熟帶子壽司，芝士白蝦壽司似乎好食好多，一來蝦肉味道鮮甜，而口感爽彈，二來唧咗啲芝士醬落去，令食味有種昇華感，鹹香嘅芝士更突出到白蝦嘅甜味。
炙燒牛油熟帶子壽司 $17對比起之前兩款嘅帆立貝壽司，呢一客嘅帆立貝就感覺真喺熟啲，一客有兩件，只塗上牛油再炙燒，所以，算喺食其原味為主，入口口感柔嫩而有微微牛油香，算喺唔錯。
竹輪卷湯烏冬 $22 擔心唔夠飽，亦想老婆食番啲熱嘢，湯烏冬佢就最鍾意架喇，簡簡單單一客「竹輪卷湯烏冬」已好夠。雖然只賣$22，都好大碗吓，夠晒我哋兩個人共享。烏冬夠晒滑身，口感煙韌，竹輪卷食得出唔喺嗰啲勁溝粉貨色，個湯頭亦清香，又真喺唔錯喎。
食飽飽，又行吓荔枝角公園，疫情都喺反反覆覆，生活就要找吓點子，食一餐想食嘅嘢，去一啲想行吓嘅地方，以作生活嘅平衡！今日呢餐，都OK啦，有中電「贊助」吖嘛，哈哈！
個人評分
味道：7/10
環境：7/10
服務：8/10
抵食：7/10
平均每人消費：HK$95
味道：7/10
環境：7/10
服務：8/10
抵食：7/10
平均每人消費：HK$95
餐廳資料：
元気寿司 Genki Sushi
美孚寶輪街1號曼坊地下9號舖
3564 8653
元気寿司 Genki Sushi
美孚寶輪街1號曼坊地下9號舖
3564 8653
沒有留言:
發佈留言