而仍在疫情之下，枱橷嘅安排都寧舍闊落，又做了不少功夫加強防疫，讓客人用餐就更安心。
吸引小弟到訪，都喺因為呢個套餐夠划算，又好預數，平日定價成人為$268（假日為$298），最正喺4小時任食（當然限聚下頂多10:00pm都要離場），唔似啲放題限時兩個鐘，食到趕候趕命，依家就可以慢慢嘆，回一回氣再嗌，此外，免茶芥、免加一（餐單寫另收茶芥、加一，其實已經取消咗），所以咪話佢好預數囉。不過，想任飲汽水、橙汁、啤酒，就需額外加錢。
除咗幾款貴價嘅指定菜式一人一客之外，仲有超過30款菜式（有小食、小炒、素菜）任點任食，素菜就最啱我老婆啦。而且，比較自助餐，放題嘅好處就喺可以任食之餘，啲菜式由廚房直接拎到客人枱上，交叉感染嘅風險相對低好多。
齊齊撈起 雖然「撈起」喺星馬一帶華人嘅新年菜，寓意撈起撈起撈到風生水起，但近年本地都有唔少餐廳推出呢一款菜。不過，食材都無話特別一定喺咩，可謂各施各法，最緊要喺賣相夠清新，好似呢度嘅就有燈籠椒、西芹、粟米粒、子薑、哈蜜瓜、青瓜、甘筍、魚仔乾、柚子、花生、炸蓮藕片、大蔥……等等，撈勻，再淋上芝麻醬及灑下白芝麻（芝麻就裝晌利是封仔之內，真鬼馬），用料豐富。
最緊要喺撈得夠均勻，配以醬汁，入口感覺非常清爽，因為有唔同食材，味道極多元化，口感豐富。作為前菜，極之可以幫助打開胃納。
金沙波士頓龍蝦（半隻） 食龍蝦大多數都喺西式食法多，喺以前一大棚人食啲全包宴就會食到芝士焗龍蝦加伊麵底，今回就以鹹蛋黃做，都喺第一次。賣相都幾吸晴，鹹蛋黃做成「金沙」，自然喺好惹味，而鹹香之下，仍食到蝦肉嘅鮮味，再者，蝦肉又好爽彈喎！
杞子花雕BB鴿（半隻） 醉雞食得較多，醉乳鴿都唔喺未食過，不過，一手揸住半隻嚟咬就未試過，食得豪邁夠爽。乳鴿嘅肉夠緊緻細嫩，帶有微微酒香，入口冰涼清爽。
蟲草花燉螺頭湯 湯品有兩款選擇，我哋兩個人就梗喺要晒兩款啦。撈一撈啲渣，真材實料架，湯色清而不濁，丁點油膩都無，飲落湯頭清甜醇香，燉得夠火候，滋補好味。
竹笙濃湯碗仔翅 碗仔翅？唔好諗喺平常街邊嗰啲，以濃雞湯做底，所以，個湯味已夠晒濃郁，而湯外真喺有魚翅，仲大大瓣，配以爽口嘅竹笙，同樣出色好飲。
丹麥叉燒 老婆問我咩丹麥叉燒，如果無錯，「丹麥」應該喺指嚟自丹麥一隻叫品牌「皇冠」嘅無激素豬肉，所以，至少呢碟叉燒喺無添加。基本上啲叉燒無咩肥肉，切得厚薄均一，入口鬆化而軟熟。
沙薑豬手 另一款小食要咗豬手，配沙薑，感覺特別少少。啲豬手食落幾爽口，無論喺啲豬皮，定喺啲肉，咬落都好清爽，帶點點沙薑嘅香味，卻又加入少少花椒，所以，有微微麻辣香，但好微啫，唔喺辣到噴火嗰種，頗有特色。
避風塘海蝦 小炒類先嚟碟炒海蝦，啲蝦都算幾大隻，以炸蒜、辣椒去炒，所以，份外鹹香惹味，而蝦肉本身亦鮮甜彈牙，喺新鮮貨嘅證明。
XO醬炒蚌柳 另一道小炒要咗炒蚌柳，而蚌貝用咗北寄貝入饌，出嚟嘅效果唔錯，啲北寄貝口感柔韌爽口，唔會韌到好似擦紙膠咁咬唔到，而XO醬炒就梗喺賣香濃惹味啦。
薏米浸淮山 雖然，填紙仔點菜時都有列明人數，不過，呢碟淮山就似乎大碟咗啲，如果再有得細細碟就更好。啲淮山入口黏黏哋，但又有種爽爽脆，配薏米湯，健康清新，所以，老婆食得最多。
豉味虎皮椒 老婆一向喜歡食辣椒，呢碟都喺佢嘅欽點，兩款尖椒都炒得好食，就充滿豆豉香味，微辣就啱晒我添，如果用嚟伴飯，一流呀。
Movenpick雪糕 平常喺食自助餐先會有Movenpick雪糕提供啫，估唔到連食中菜都有，Movenpick雪糕嘅質素唔使多講，睇過小弟自助餐嘅食評，都會見我實食多兩三球。雖然只得一杯，但剛好喺特濃瑞士朱古力口味，合晒我哋口味，雪糕軟滑香濃，內裡仲混有朱古力碎片，實在好食。個人就建議吓酒家，甜點呢個部份睇吓可唔可以加多一款中式糖水，如乜露物露俾客人揀，因為有啲客或長者可能唔多食雪糕。
順帶一提，因為見佢都棟咗另一個餐牌出嚟，如果呢個「襟撈五式」放題套餐唔啱食，可以考慮另一款「尊貴鮑魚餐」，又或者湊夠4個人，可以點個划算啲嘅「至尊四人餐」。
疫情下，都好耐未食過放題，唯可惜，始終疫情關係，加上仍有限聚令，唔可以搵多三幾個老友嚟聚一聚兼食番餐，否則，就可以試到更多美味菜式。
個人評分
味道：8/10
環境：8/10
服務：9/10
抵食：8/10
平均每人消費：HK$268
味道：8/10
環境：8/10
服務：9/10
抵食：8/10
平均每人消費：HK$268
餐廳資料：
會所1號 愉花園 ClubONE In Bloom
荃灣青山公路荃灣段398號愉景新城3樓3005號舖
3582 4085
會所1號 愉花園 ClubONE In Bloom
荃灣青山公路荃灣段398號愉景新城3樓3005號舖
3582 4085
沒有留言:
發佈留言