Cafe Foodeli：一價兩食

話行獅子山講咗好幾次，卒之都成事，朋友帶路，由大圍經紅莓谷上，過咗獅子山，再由沙田坳落番去黃大仙走，成段路對我哋兩個行慣山嘅人真喺難度無乜，仲比預期快多半個鐘完成。行完山，最佳郵節目喺嘆下午茶，攤抖吓兼補充體力，友人有好介紹，就喺小巴站旁「新光M2」商場內嘅「Cafe Foodeli」。

餐廳晌商場二樓，屬開放形式，即喺唔喺入鋪，乃喺跟商場融為一體，用餐區就正正喺商場嘅中間位置，地方都幾大、幾闊落。

簡單嘅木系裝修，一室木枱木椅，仲擺設咗少少植物，有別一般快餐店，觀感唔錯。由於下午茶時段，客人唔多，想點坐就點坐。

電子螢幕餐牌，就晌收銀旁，此時此刻，仲有啲燒味飯、焗飯供應。當然，講抵嘅就喺啲常餐、茶餐。不得不提提收銀阿姐好人，因為，初時睇中佢哋嘅滿分推介有款朱古力紅豆西多士（配餐飲）賣$32，阿姐話你不如揀上面嘅「A+B」餐啦，同樣有呢款多士，搭多樣嘢賣$34咋。

朱古力紅豆西多士 + 即炸大雞脾 + 熱咖啡 $34

被阿姐咁講一講，再研究吓個「A+B」餐，A嗰邊就選定咗西多士，而B嗰邊嗌雞脾肯定喺性價比最高嘅選項，再搭杯咖啡，點止喺個下午茶餐咁簡單，而且，真喺非常之抵。

朱古力紅豆西多士

初頭真喺以為西多裡面夾坐啲紅豆及塗上朱古力醬，都啱一半，裡面真喺夾咗好多紅豆，而面面就唧咗好多朱古力漿，所以，就唔需要再加糖膠。件西多本身炸得金黃，又夠透，配上朱古力漿及紅豆，確喺好食。

即炸大雞脾

隻雞脾夠晒大隻，有成隻手掌之大，拎上手非常墜手，斤兩十足，無話將貨就價。炸到金黃，睇樣都覺得好甘香，一口咬落去，外皮卜卜脆，喺略嫌有少少油，但肉質就幾嫩滑，所以，就算喺雪藏雞（估計都喺啦）處理得好一樣效果唔差。

熱咖啡
因為唔喺茶記，驚點奶茶風險高，所以，咖啡就穩陣啲。啲咖啡飲得出喺即磨貨式，唔喺咖啡粉，味道唔錯，幾醇香。

雖然喺茶餐，但今個份量絕對頂到當一餐飯，所以，食完呢個茶餐都覺得好飽，直情喺平常食兩個茶餐嘅份量。怪唔得，事後再留意吓，唔少街坊叫一份茶餐，就兩個人食，尤其啲家庭客。

個人評分
味道：8/10
環境：7/10
服務：7/10
抵食：9/10
平均每人消費：HK$34

餐廳資料：
Cafe Foodeli
黃大仙龍翔道120號新光中心2樓205-208A號舖
3170 4731