大川滬 Shanghai Yen：滬滬餸

早陣子同屋企人晌「南小館」食咗餐上海菜，不過不失咁啦，今日嚟到土瓜灣趴趴走，同樣又喺食上海菜，非集團餐廳，而喺屬街坊小店，店名叫「大川滬」，一睇就知主打上海菜同四川菜啦。

推門而入，估唔到都幾多人，結果被安排坐到最後排，都幾好，相對少啲人行嚟行去。食食吓，有個人向小弟打招呼，原來喺舊同學，佢又喺同老婆食晏，佢話呢間鋪前身喺茶記，咁又睇唔出喎。不過，餐牌除咗有滬菜、川菜，又確喺有啲茶記嘢。

兩大張主餐牌，由涼拌、小菜、湯品、飯麵、點心及甜品，都睇到唔少眼熟嘅川滬菜式。有啲心水菜式，老婆又想試吓，所以，散點又叫啲。

就算周末、周日，一樣有啲午市客飯套餐，都喺60、70蚊，包老火湯、白飯、餐飲，可以+$8改豆漿，+$12改紅豆冰或特飲。所以，我哋亦點一套客飯，用嚟墊肚。

上文都提及過餐廳提供少少港式嘢，相信依家啲生意都較難做，梗喺盡量多元化啲，等一枱客人有多啲選擇，亦幫補做多少少生意。

上海小籠包 $45

嚟到上海鋪，嗌小籠包就最睇到師傅做點心嘅功力去到邊。單睇賣相唔錯，摺紋清晰，咬一小口，湯汁湧流，卻唔會太熨口，再望望，皮薄而咬落食到好有韌性，所以，夾起都唔會咁易穿底，而肉餡亦都好鬆化，肉汁飽滿，真喺好得。

油炆小竹筍 $55

兩款小食都喺老婆嘅欽點，先喺碟小竹筍。雖然叫油炆，但唔會食到「油淋淋」，啲竹筍口感爽爽哋，味道頗為惹味。

香煎素鵝 $58

素鵝當然試過唔少，但今次真喺有啲驚喜，素鵝中間捲住啲野菌，所以，有陣陣菌香。而素鵝本身炸得甘香，入口香脆不膩，好食。

老火湯（客飯套餐）

是日喺老黃瓜青紅蘿蔔粟米素湯，果然夠火候，飲落味道清，但唔會覺得寡。店主好好人，俾夠兩碗我哋，喺啲小店先咁足人情味，大鋪或連鎖店就大多按本子辦事。

口水雞（客飯） $70

初頭都諗緊要蔥油雞好，定口水雞好，但店主話佢哋嘅口水雞唔會太辣，但就好惹味，所以，就點咗後者。雖然，送到嚟一片火辣辣嘅血紅，但又真喺唔喺好辣咋喎，帶微微嘅麻，而且，香味好有層次，喜歡辣嘅朋友亦可要求加辣。啲雞又點呢？雞肉好鮮，肉質緊緻細滑，皮下脂肪少，就連伴碟嘅炸花生都寧舍脆口。

豆漿 +$8

本來想飲杯奶茶，但老婆想飲豆漿，投其所好，而且，仲可以揀熱嘅。豆漿果然喺自家製，因為飲得出豆味好濃郁，少甜更合佢心意。

桃膠紅棗燉雪蓮 $58

食完兩公婆都仲有少少位，一於點多一客甜品共享，等餐飯有個完美結束。揀燉雪蓮，皆因未試過，更由店主親自奉上，並解釋佢哋用上靚嘅桃膠同雪蓮，而且，以石蜂糖入饌，非一般冰糖、片糖，更加養生、有療效。細味一下，個燉雪蓮好清潤，帶有濃濃棗香，桃膠已煮至融入糖水中，老婆話非常治癒。

晌呢區走咗一圈，真喺變化咗好多，遲啲年尾屯馬線通晒，有埋「土瓜灣站」、「宋皇臺站」，而小弟本身就住近西鐵線，第時過嚟一程過，超方便。

個人評分
味道：9/10
環境：7/10
服務：8/10
抵食：8/10
平均每人消費：HK$145

餐廳資料：
大川滬 Shanghai Yen
土瓜灣北帝街21-25號匯川大廈地下B-J舖
2713 3343