新金富飲食中心：苦盡「金」來

上次由西貢，行經茅坪、竹林隧道、西貢藤皇至馬鞍山大水坑嘅「富安花園」，喺探路嚟，今回就正式帶朋友行一轉，因為同行有啲唔多行山嘅朋友，怕行錯路累佢哋行多好多冤枉路。到達「富安花園」後，正正食晏時間，上次試咗「裕發小廚」，今次就試「新金富」，茶記平靚正，一向喺小弟填肚首選。

其實，嚴格嚟講，「新金富」唔算喺間茶記，應該定位為小型嘅中菜館，入到裡面，跟茶記較明顯嘅分別，主要喺以細圓格為主，眼見就無乜卡位喇。環境算企理嘅，防疫意識，就一般般啦，我哋揀咗個角落位，感覺安心少少。

食物方面，就以碟頭飯為主，以及一啲經濟客飯；晚市嘅話，就喺小炒呀、煲仔呀、湯羹呀之類，定價都大眾化，始終開得晌呢度，主要都喺做街坊生意。

此外，有別一般茶記，睇均啲餐牌，都唔多見啲乜乜常餐，乜乜快餐，不過，午市就有提供啲精選午餐，定價$47，包例湯、包嘢飲，當然喺較多人嘅選擇。

粉葛煲豬骨

雖然喺例湯，但都算無欺場，飲落夠火喉，更唔會「淡茂茂」，仲好大碗添，完全收貨啦。

炒貴刁

5款午餐，當然喺炒貴刁考功夫啲啦，除咗街坊客，亦有唔少工友幫襯，所以，碟頭都大份啲。此外，夠晒料多，包括蝦仁、火腿、銀芽、韮黃……等等，面面仲糝啲白芝麻，夠晒誠意啦。食落，河粉唔算好油，睇我清晒成碟之後，碟底唔會一灘油就知啦，而炒功亦唔錯，啲河粉唔會黐埋一嚿嚿，滲出陣陣咖喱香。

熱奶茶

雖然行到有少少身水身汗，但我都喺喜歡嘆番杯熱奶茶。佢哋嘅奶茶真喺唔錯，茶底頗為醇厚幽香，飲落有回甘，只喺稍嫌奶多咗少少而已。

今次做咗標題黨，其實今次條路線本身唔難行（仲喺短期內行第二次添），加上天氣仲喺涼涼哋，所以，行完當然唔覺攰。而食完餐滿意嘅「晏仔」，就更自不然活力充沛。當然，對有啲少行山，平時又唔多運動嘅人嚟謂，上上落落幾個鐘都已經有少少甘，苦盡甘來可能都未有太誇張，但最緊要，都喺大家行得開心，食得稱心！

個人評分
味道：8/10
環境：6/10
服務：7/10
抵食：8/10
平均每人消費：HK$47

餐廳資料：
新金富飲食中心
馬鞍山恆信街2號富安花園商場地下20號舖
2641 1666