裕發小廚：出乎「裕」料

西貢嘅茅坪之行，睇睇藤皇、竹林隧道，約咗幾次，唔喺人腳問題，就喺天氣唔好，今回卒之順利搞得成，由西貢起步，輕輕鬆鬆連埋打卡3個鐘，終點喺馬鞍山大水坑嘅富安花園，所以，順道就晌呢處食晏。今團喺探路團，所以，幾位都喺麻甩佬，食晏地點就一致揀茶記啦。

富安花園有好多茶記，我哋都喺隨意點指兵兵咁，「裕發」見有位，咪「裕發」囉。入內，地方細細，茶記格局，有卡位，有圓格。室外喺吸煙位，就梗喺坐番晌室內啦。

茶記就乜都有，但呢個時間嚟，最快捷嘅就喺快餐，一個餐牌喺中式，另一個餐牌喺西式，同樣賣$46連餐飲。

生炒雞絲飯 $46

雖然喺快餐咋，但都喺即叫即炒，所以，上枱時碟炒飯好夠「鑊氣」，而且，碟飯超大碟，堆到成座山，所以食得我好飽；亦有好多雞肉絲、生菜絲，食落飯粒爽身唔油，食到尾，更唔會見到碟底泛油，師傅炒得手勢好，有啲出乎預料。

熱奶茶

夠穩陣嘅選擇，尤其呢啲舊舊哋嘅茶記，入口芳香，茶味醇厚，又富奶香，茶奶比例啱啱好，未至於絲咁滑，但都算高水準。

近來幾篇行完山嘅食評都無乜點擺啲風景相，今次嘅藤皇、竹林隧道確喺幾特別，所以，就擺多少少相出嚟分享吓。當日天氣一般，較大霧，起行前又落過雨，啲石路都幾跣，所以，落過嘅話都唔太建議行。

食完散水，就晌餐廳對出有個大巴士站，有車去城隧轉車站，話咁快就返到美孚，估唔到又幾方便喎。

個人評分
味道：8/10
環境：6/10
服務：7/10
抵食：8/10
平均每人消費：HK$46

餐廳資料：
裕發小廚
馬鞍山富安花園商場23-24號舖
2643 9455