吉早喵 Catopia：特「糬」口味

前文就提過因為行完獅子山，就落咗黃大仙「新光M2」商場內嘅「Cafe Foodeli」食下午茶，走嘅時候近商場出口位見到家台式古早蛋糕店「古早喵」，無錯，又喺啲古早蛋糕鋪，見人頭湧湧唔少街坊，似乎喺新張，又有啲折扣優惠，就順帶買一個返去孝敬老婆。

鋪面都幾整潔，所有成品都放晌玻璃櫃內，加上喺商場鋪，無咗地鋪對街啲灰灰塵塵。

而款式及價錢，就晌收銀處前面部電子屏幕顯示晒出嚟，是日所見，款式唔太多，只有5款，定價$50-$85，依家仲有9折優惠，長者就直接減$10。

日本紅豆麻糬古早蛋糕 $80

老婆鍾意食紅豆，而紅豆搭麻糬，好似幾得意，所以，就揀咗呢一款，折後$72。包裝袋同包裝盒都幾得意，以貓貓做主角，加上店名，相信店店主都喺愛貓之人。

一如大多數嘅古早蛋糕店，包裝盒幾邊都有啲資訊，例如介紹佢哋出品嘅亮點啦，食用期……等等，此外，更有一大篇幅介紹其店名由來……啊！原來本如此。

打開包裝盒，見到蛋糕面烙印咗店家啲標誌，幾有趣，不過，成個蛋糕拎出嚟睇，外觀就麻麻，中間有啲塌塌哋，紅豆及麻糬餡瀉晒出嚟。然而，味道就唔錯，蛋糕部份就幾有蛋香味，口感軟綿而微微濕潤感，店家標明用日本紅豆，都算清甜，麻糬就加添一啲煙韌感，但個人覺得可以減番少少麻糬嘅份量，一來唔會爆到咁肉酸，二來可突出番紅豆喺主角。

唔知古早蛋糕呢個熱潮仲有幾耐，因為，真喺開到成行成市，間間都話古早，有啲似十多年前嘅日式芝士蛋糕咁。

個人評分
味道：7/10
環境：7/10
服務：8/10
抵食：7/10
平均每人消費：HK$72

餐廳資料：
吉早喵 Catopia
黃大仙龍翔道120號新光中心2樓260號舖
9810 1042