驚安燒肉商店 Gekiyasu Yakiniku：歡樂今「燒」

日式燒肉都應該年幾未食過喇，最近，因為友人嘅強烈推介，就再重溫一下日式燒肉嘅美味。地點就喺尖沙咀嘅「驚安燒肉商店」，無論價錢，還是食材質素，友人都話喺性價比高，其九宮格牛肉更晌IG不停咁出現，所以，先搞到心郁郁。

餐廳位處一幢食廈樓上，估唔到進入餐廳，原來地方都頗大，設計摩登，而且，枱與枱嘅編排又相隔夠開，坐落都幾稱心。

餐廳尾仲有啲廂房嘅設計，但限聚下未必用得盡，但一樣開放番可以做到散枱。如果無晒疫情，夠人多，自成一角不知幾好。

食日式燒肉最緊要夠火力，啲爐都真喺好夠力，抽油煙採用下抽式，整體嚟講，都唔錯，至少食完我哋都無話一頭煙味。

甫坐低，已備有3款特色調味料，包括辣醬油、燒肉汁、蒜蓉，唔夠嘅話，枱邊仲有幾款，如七味粉、胡椒、海鹽……等等。

由於餐廳採用手機掃二維碼點餐，一來減少人為落單有機會嘅出錯，二來方便分多次落單，再者，一路落單佢就一路幫你計埋個總銷費，一目了然。不過，今次就影唔到餐牌俾大家參考，只喺門口有大大張燒肉（或海鮮）嘅大海報，其實，由各款肉類、海鮮、沙律、串燒、飯品、甜品……到酒精及非酒精飲品都一應俱全。

青檸菠蘿梳打 $28、可樂 $18

一個打邊爐，一個日式或韓式燒肉，點可以唔嗌定杯凍飲。環顧飲品餐牌，最抵飲喺啲梳打喇，賣$28，大大杯夠冰凍，仲俾到成粒青檸，亦有唔少菠蘿粒，邊食邊飲，酸爽清涼呀。

九宮格燒牛盛盒 $288

人就總喺多心嘅，所以，呢一款「九宮格」可以講喺店家名物，更喺牛魔王恩物，10枱起碼有8、9枱會點，因為一次過可以試到9款唔同嘅牛肉，樣樣少少咁，啱晒人少嘅組合。有邊9款，問完店員都唔喺記得幾多，大概包括有牛小排、牛肋條、牛仔骨、A4和牛、厚切牛舌芯、牛護心肉、牛肉眼……等等，有啲醃漬過，有啲就原味登場。

因為實在太多款式，所以，今次就唔逐一講，但整體而言，食得出喺高質素嘅，無論有醃過嘅，還是無醃過嘅，都同樣出色，而且，唔同部位，有唔同味道同口感，絕對喺一次美味體驗之旅。

柚子漬雞肉山 $38

另一款推薦嘅肉就喺呢一款，推薦原因喺以柚子漬，其次喺抵食到爆。單喺睇個份量，只賣$38，堅堆到成座小山咁，頭頭尾尾有成10件雞肉，入口，真喺有陣陣柚子香，雞肉亦都好嫩滑。

一口甜薯串 $12
貪口癮，所以，點咗呢串日本蕃薯仔，之前睇過啲新聞，其實，日本人唔喺好食呢啲蕃薯仔，經本地商人推廣吓，就成為串燒名物。其實，真喺幾好食，一來細細粒一口一粒，可以連皮食，又夠粉甜。

芝士年糕 $28

小弟就鍾情芝士年糕，去串燒店時不時都有點，今次晌度食，就可以自己燒埋。店員教路，放晌爐邊烘焙就OK，我哋想有啲焦香效果，臨尾放中間燒多1分鐘。件年糕好好食，皮薄，裡面佔大部份喺芝士，軟軟綿綿，仲有點點流心感。沾點煉奶，鹹鹹甜甜，別有一番風味。

野菜六盛盒 $58

咁多肉，喺時間食番啲蔬菜啦，揀盛盒就唔使煩，一個盛盒共有6款野菜，包括冬菇、雞脾菇、萵筍、粟米芯、翠玉瓜同秋葵，每樣兩片，擺明喺二人份。雖然睇落好似唔喺好多，但每款蔬菜都具質素，同時，食番啲蔬菜無咁「罪孽深重」，哈哈！

飯團 $18

友人喺「飯桶」嚟，點都要有啲啲飯落肚，咁就不如一人一個飯團，而飯團可以另加配料，如明太子、蟹膏……，好似每款加$2。有驚喜，因為飯團唔白飯一嚿，混入好多食材，如藜麥、芝麻、紫菜碎……等等。嚐試學人放晌爐上燒一燒，我嗰個有少少散，但友人嗰個好完整，自己再包紫菜，紫菜好脆，飯團有微微焦香，味道豐富，真喺要預番少少位試飯團。

黑糖珍珠千層蛋糕 $28

友人喺「飯桶」，小弟喺「甜魔」，所以，點番件心水甜點先。泡芙雖然好抵食，$12 / 4粒，不過是，我就睇中呢一款黑糖珍珠千層蛋糕，因為黑糖、珍珠都喺心水嘢，二來千層蛋糕只賣$28咋，值搏率高。賣相睇落已經好唔錯，餅皮夠薄亦夠多層，啲珍珠好有咬口，仲帶有濃香嘅黑糖香味，相對地，少甜添。

今餐大家都好滿足，食到高質燒肉，又試咗啲特色嘢，而招呼都好唔錯，主動幫忙換網、收拾餐具、器皿。最稱心喺食咁多嘢，每人都唔使三嚿，覺得好划算吓。

個人評分
味道：9/10
環境：7/10
服務：8/10
抵食：8/10
平均每人消費：HK$295

餐廳資料：
驚安燒肉商店 Gekiyasu Yakiniku
尖沙咀金馬倫道48號中國保險大廈3樓C號舖
9878 8065