School Food Blooming Mari：韓食「學校餐」

雖然韓劇成日有睇，近排就追緊「西西弗斯的神話」、「文森佐」，不過，韓國菜就唔算食得多，一年三、五、七次咁大把。老實講，「School Food」呢個品牌小弟唔喺好認識，事後上網睇睇原來都有幾家分店，今次事緣過嚟旺角有嘢買，就搵搵有咩抵食外賣，就搜尋到呢間抵食韓式外賣點。

餐廳位處地庫嘅美食廣場，地點好就腳，買完外賣就可以直接穿過去地鐵站，唔使上返地面。用餐嘅地方都好大，加上樓底都高，感覺都好闊落，而由於座椅用上橙橙紅紅，所以，整個場睇起嚟好搶眼。

睇睇食物選擇，確喺幾實惠，幾十蚊都有交易，又有啲飯卷嘅雙拼優惠，此外，有多種飯麵套餐，價錢都好大眾化，最好喺有多種加配優惠嘛，可以食得更有彈性！

M10 紫菜包飯拼拼 $54

研究咗好耐，呢個雙拼堅抵，除咗可自由組合兩款紫菜屯包飯，仲奉送埋一客魚糕湯。對比過啲價錢，散點啲紫菜包飯由$25-$30，當然揀貴啲啲嘅款式嚟配啦，而個魚糕湯就等同免費送。

蜜糖芥末炸雞

啲紫菜包飯除咗主題食材，仲有啲漬醃黃瓜，所以，食起嚟唔會好單調，而啲蜜糖芥末炸雞當然唔似食韓式炸雞熱辣香口，但味道都唔錯。

原味餐肉

本來想嗌韓式烤豬肉，可惜暫停供應，就改要餐肉。唔好睇少啲韓國餐肉，有去超市買開，都知唔平，餐肉中夾有少少泡菜，都滋味。

魚糕湯

睇韓劇時，見啲人好鍾意晌街邊小販檔食魚糕串，好似我哋晌街邊篤魚蛋，不過，外賣就無得「篤」，擺晒落湯度。而嗌紫菜包飯拼拼所送嘅主要喺魚糕「湯」，所以，裡面都喺得兩片魚糕，叫過吓口癮。

L11 芝士辣炒年糕配拉麵+魚糕串+炸紫菜卷 $67

呢個餐就為老婆而點，辣嘢我就唔多啱口味，但佢就OK，而且，佢幾鍾意食韓式年糕，我哋都有晌超市買嚟自己整。個餐都算豐富，有芝士辣炒年糕，並配上一份拉麵、一份魚糕串及兩件炸紫菜卷。

芝士辣炒年糕配拉麵

雖然喺外賣，拎到返屋企會打咗少少折扣，但味道真喺唔錯，老婆話夠辣勁，但又唔會死辣，將啲芝士攪勻，又有拉芝效果，而年糕煙韌有咬口，沾滿晒辣汁真喺一流，韓式拉麵亦唔錯。至於小弟，試兩、三口好了，因為真喺堅辣。

魚糕串

有別上面提過嘅魚糕湯，呢碗就寫明喺魚糕「串」，即喺韓劇見當地人篤嗰啲，當然，無得「串」，放晒晌湯中，除魚糕，仲有啲好似喺魚丸、魚蛋之類，味道OK嘅，喺個湯有少少鹹啫。

炸紫菜卷

兩粒紫菜卷過咗氣，喺唔熱辣辣啫，但都仲好脆口，裡面捲住嘅喺韓式粉絲，所以，成粒都喺素食嘢。

食完餐韓國菜，又想番起幾套韓國綜藝，包括「一日三餐」、「尹食堂」，最近就有「尹食堂」班底所做嘅「尹Stay」，由於出唔到國，就晌韓國小村落嘅韓屋，搞民宿接待外國人，都幾好睇，好想試到有美科長嘅手勢，哈哈！

個人評分
味道：7/10
環境：7/10
服務：7/10
抵食：8/10
平均每人消費：HK$60

餐廳資料：
School Food Blooming Mari
旺角彌敦道700號T.O.P.地庫層B04號舖
2333 3703