雖然小弟絕非文青，因為肚內既無墨水，亦都唔年青，但其實，早就從文青朋友口中聽聞「屋子生活」嘅大名。走進店內，唔止地方大，而且，超高樓底，均令空間感十足，即使坐滿客，都亳無侷促感，喺市區咖啡店少有嘅環境。
牆上掛有唔少擺設外，巨型手繪亦喺亮點之一，據之前睇過嘅飲食雜誌報導，喺出自台灣插畫師手筆，值得細心欣賞。
除咗舒適嘅梳化椅之外，中央位置放咗一張巨型嘅共同餐枱，喺近年唔少餐廳都會用到嘅形式，可以將陌生人連繫到一齊嘅平台。偶爾遇到健談嘅，大可輕談一下飲食。
不過，講到全店嘅最焦點，非餐廳尾尾一排排嘅榻榻米座，特別有種暖暖嘅感覺；此外，巨型嘅落地大玻璃窗，不單令環境更感開揚，更讓柔和嘅天然光透入室內，使人覺得更有活力，打起精神。唯可惜天公不造美，未有燦爛嘅陽光嚟配合。
文青元素又豈止於此，晌入門口處，刻意打造一角，擺放好多手工造陶瓷餐具，個個造型都有個性，又獨特，有興趣嘅話大可以買返屋企。
因為環境確喺餐廳嘅賣點之一，所以，描述嘅篇幅比平時嘅食文多。跟住介紹吓佢哋有咩食，餐牌嘅設計都好特別，雖然簡單，但加埋啲手繪公仔，立時變得好文青。而將餐牌攤開，成為一大張巨型餐牌。
成張影怕太細，大家都睇唔清，所以，再逐個類別分開影，包括有泡丼、迷你丼、窩夫、飯團餐、小料、日常定食、烏冬、甜品、沙律、茶、奶昔、果汁、特色牛奶及咖啡。
仲有一張甜品及飲品嘅限定餐牌，睇落啲甜品嘅設計真喺幾特別，食材嘅配搭亦好有心思。怪不得唔少人入嚟食件蛋糕、飲杯特色飲品，配以舒適嘅環境，都覺得喺好治癒啦。
此外，入門口走過水吧位，放咗幾塊黑板，均手寫上「屋子推介」、「屋子下午茶」及「屋子限定」嘅特別出品，如果晌主餐牌諗唔到揀乜，就不如晌呢度落手嘞。
溫提一下，始終人家做要生意，但又知道唔少客人好鍾意佢哋嘅環境，所以，特別一提每人最低消費喺一杯嘢飲，入座計用餐時間限時90分鐘，希望多啲客人享受到佢哋嘅食物。順帶講講，店內都喺年青嘅服務員，活力有幹勁，又夠勤力、有禮貌。
迷你貓丼 $40
見款貓丼有個「屋子」標誌，估計喺推介啩，所以，老婆就話想試吓，其實，所有丼都可以加$40變為套餐，但佢話都唔太需要。嚟到之後，就單單一配珍珠米，淋上醬油再灑上木魚花、芝麻，非常簡單，但入口又真喺幾好食喎。$40一碗日式「靚仔」，貴唔貴有時見仁見智，但事後知道米喺越光米，醬油、木魚都喺用上日本貨，秤法又唔同晒。
吉列豚扒定食 $79
所有定食，除餐飲，仲有包埋味噌湯、沙律及配菜，所思，捧出嚟都好吸引架。話外話，佢哋食物嘅賣相都做得好精緻，餐具嘅配搭亦都花過心思，好吸晴吓。
配菜
即時諗會唔會喺啲漬物，結果喺中華沙律，即喺啲海藻，入口爽脆，清清味蕾，最重要喺營養豐富，食用價值高。
沙律
簡簡單單嘅田園沙律，配上柚子醋，食起嚟清新清爽，又讓人開胃。
味噌湯
睇樣就唔會知有無料到，但入口唔喺講個味噌濃唔濃，而喺有份醇厚而清香嘅感覺，湯內亦好足料，據介紹，佢哋啲味噌湯喺以木魚、昆布、瑤柱去熬，堅有誠意。
吉列豚扒
啲豬扒炸得金黃而均勻，除伴有爽脆嘅椰菜絲，仲有必備嘅豬扒汁，但最驚喜喺隔離橙黃色嘅芥末沙律醬，微微芥末辣，估唔到沾豬扒都唔錯喎；而啲豬扒炸得鬆脆，卻絕不油膩，肉質亦好鬆化，唔會有死實感，不過，個人就有少許嫌個外層脆漿厚咗啲。但整體嚟講，成個定食都仲喺覺得高質素。
抹綠奶茶（餐飲）
定食所包嘅餐飲並非一般茶啡，而喺蘋果茶、杏桃茶、抹綠奶茶及薑茶，都比較特別，所以，都無刻意加錢轉款。而杯嘢，飲落就好似飲緊抹茶味嘅牛奶，既有抹茶香，奶味又突出到，確喺唔錯。
「屋子」出名嘅仲有佢哋嘅甜點，一場嚟到都無理由唔試架，不過，佢哋嘅甜點定價着實唔便宜。除餐牌上嘅甜點，近門口仲有個餅櫃，擺放多款極吸引嘅甜點。櫃上兩隻招財貓，就好似同你講緊：「埋嚟睇、埋嚟揀咯喂！」
小倉抹茶窩夫 $50
老婆唔喺抹茶控，但卻頗鍾意紅豆，所以，呢道甜品喺專登點俾佢。迷你窩夫配上抹茶雪糕，再以鮮忌廉做唧花，令整個甜點嘅造型都真喺幾靚。窩夫新鮮焗，入口仲喺微微哋，又做到外脆內軟嘅效果，只不過只喺原味，並無加入抹茶元素，抹茶味都喺嚟自球雪糕，茶味清幽，啲忌廉少甜而非常滑留；小倉紅豆就以另一小碟裝起，紅豆入口清甜，軟腍啱啱好，將紅豆、雪糕、窩夫一齊放入口，滋咪融和。
香港吋金呎土，真喺入到嚟咁遠先搵到啲咁清幽嘅文青餐廳，難得喺連啲食物都做得有水準，服務又妥貼。趁周末，好好入嚟食番餐，學習一下慢活，喺何其優哉游哉！
個人評分
味道：8/10
環境：9/10
服務：8/10
抵食：8/10
平均每人消費：HK$95
味道：8/10
環境：9/10
服務：8/10
抵食：8/10
平均每人消費：HK$95
餐廳資料：
屋子生活 Uchi Coffee
馬鞍山烏溪沙路8號迎海薈地下4A舖
2662 0102
屋子生活 Uchi Coffee
馬鞍山烏溪沙路8號迎海薈地下4A舖
2662 0102
沒有留言:
發佈留言