而內裡嘅裝修就走摩登路線，配上柔和燈光，但就不失越南風情，例如餐椅用上藤椅背，餐廳尾一幅巨型牆畫，正正喺帶上越南斗笠嘅少女。最稱心喺啲枱櫈排得唔逼，配合柔和燈光，讓人坐得舒服。
不過，講到斗笠呢樣咁越南代表性嘅服飾，晌餐廳另一邊嘅卡位，就以斗笠為主，掛滿整幅牆，唔同顏色、唔同花款、唔同大細，喺餐廳嘅打卡位。
餐牌一大張過底面兩版，因為喺熨膠面，有少少反光，希望大家都睇得清楚。菜式嘅種類就分為小食、沙律、米紙卷、鍋類、燒烤、湯類、小菜、素食、飯麵、湯河、凍檬、甜品、啤酒及多款冷熱特飲。數數吓，食物嘅種類都超過80多款，而飲品亦眼見選擇甚多且富特色。
越式黃金豆腐 $68
餐牌標明喺一客6件，童叟無欺，底下仲有啲炸芋絲墊底，其實我都唔喺好知點為只「越式」，一心諗住會唔會喺香茅味呢？
一小鉢炸豆腐粒，炸得色澤金黃均勻，入口外脆內軟，裡面嘅豆腐真喺好軟滑。至於味道喺點？入口覺得主要喺淮鹽味，感覺有啲似細個晌快餐店食炸雞翼，嗰時喺興灑淮鹽嘅。整體食味唔錯，不過，好食就好食，但跟我期待嘅「越式」有啲落差，哈哈！
火車頭湯河粉 $108
湯河類有眾多選擇，揀「火車頭」純粹覺得佢夠代表性，像大多數越南店嘅慣例，除河粉，仲可揀金邊粉或檬粉。
叫得火車頭就梗喺大陣容啦，底下唔只滑溜嘅河粉多，仲有齊生牛肉、牛腩片、牛根丸、牛筋、牛栢葉，而且，樣樣都打孖上，啱晒一碗兩個人「些牙」，再者，用料不賴，生牛肉好嫩滑，牛腩片鬆化有肉香，牛丸彈牙，更有種好似安格斯嘅肉味添，牛筋炆又腍又滑，牛栢葉就好爽口。此外，個牛骨湯底都超正，濃而不膩，深而不濁。
順化鮮茄牛腩煲 $118
親友九月先去過一趟越南中部，包括蜆港及會安，但就正正無去順化，呢一道順化鮮茄牛腩煲會唔會俾到啲慰藉佢呢？
而鍋類食品都可以另配白飯（+$14）、蝦片或鍋巴（+$20）、蒜蓉牛油法包或印度薄餅（+$42），配鍋巴我哋就覺得夾得嚟又有特色。
咪睇佢一小鍋，又只喺得半滿，其實牛腩嘅份量真喺唔少，但最緊要炆得夠正，啲牛腩咬落好鬆化，既有肉香，又帶點脂肪，而且，個汁底亦好香濃，配以脆到咔咔聲嘅鍋巴，食得過癮。
椰青糕（6件）$38
暫時所見，甜品只得4款，當中，以椰青糕最感興趣，一來印象中未試過，二來以椰青做甜品，預期唔會差得去邊。
啲椰青糕做得好的骰，以花同葉作成外型，入口確喺滿滿清甜嘅椰青味，底下仲有少少椰青肉添，而口感，極似大菜糕一類。加片大葉墊底做襯托，令成碟甜點都唔會過於單調。
總結一下，餐廳嘅環境好，食物有水準，以尖沙咀而言，定價亦唔算高，難得呢度較靜侷方便傾偈嘛！服務亦好到位，添水、換碟都做足，印象最深，喺前枱做接待位靚女，直頭好似喺餐廳公關咁，知我影相，特意話我知有幅「斗笠牆」，否則都錯過呢個打卡位呀！
個人評分
味道：8/10
環境：8/10
服務：8/10
抵食：8/10
平均每人消費：HK$195
味道：8/10
環境：8/10
服務：8/10
抵食：8/10
平均每人消費：HK$195
餐廳資料：
Madam Saigon
尖沙咀彌敦道132號美麗華廣場1期低層地下B131號舖
2808 4777
Madam Saigon
尖沙咀彌敦道132號美麗華廣場1期低層地下B131號舖
2808 4777
沒有留言:
發佈留言