東鮨居酒屋 Azuma：第二街好鮨味

一條港島西延線，唔止帶動好多商機，連帶都令我多咗走入嚟食飯，加上其中一位表姨甥女就讀港大，兼且大部份時間住晌宿舍，更易搵到飯腳。呢一夜，又嚟到第二街搵食，喺一家新開嘅居酒屋「東鮨」。

雖然餐廳嘅地址寫明喺第二街，其實，正式嘅入口卻開喺轉角落斜嘅東邊街旁。走入鋪內，地方唔大，屬小店格局，兩邊水泥牆，裝修簡約，和風嘅裝飾唔多，而全場都喺高腳枱櫈。

不過，枱上嘅餐具倒喺幾精緻。

餐牌共有兩本，原以為一本喺食物，一本喺酒水，實際卻喺無咩點分，翻一轉之後覺得似喺無咩次序，而以下文字及相片嘅次序都喺經小弟重新編排過，方便大家參考：沙律、小食、炸物、刺身、壽司、卷物、串燒、爐端燒及甜點。

既然叫得居酒屋，就梗喺有酒賣啦，啤酒、清酒、果汁、汽水一應俱全。整體而言，個人就覺得個餐牌過於簡單，只喺普通白紙黑紙，有欠吸引度。 

此外，枱上仲有多款日本清酒嘅推介，兼且推出試業優惠價，不過，我哋都唔好酒，所以，未有一嚐。

除基本餐牌外，牆上仲有兩個特別餐牌，分別喺「是日精選」及「日本直送鮮魚」，都喺值得留意一下。

Azuma新鮮生蠔 $10

晌「是日精選」度就發現平靚正日本生蠔推廣，原價賣$28，依家$10隻，限量供應，極吸引嘅優惠，所以嗌咗半打。賣相方面，跟平時晌西餐廳食嘅有少許分別，就喺多咗少少裝飾，較具和風嘅意境。

啲蠔唔止睇落肥美，雖然唔算餘韻長，但都蠔味足，帶微微爽脆嘅口感，海水味唔太重，頗適合初食蠔嘅客人。師傅專登切埋柱位，方便食用，$10隻真喺超抵食。

刺身、壽司卷

再嚟喺一客刺身搭壽司卷嘅拼盤，呢度所賣嘅壽司唔平，所標嘅價錢都喺以一貫計，即喺逐件計，所以，只揀3款壽司及1款卷物。砌出嚟嘅賣相幾靚仔架，山葵都喺用上手磨嘅。

油甘魚 $28

淡紅嘅油甘魚，色澤晶瑩有光澤，入口鮮味，不過，個人就覺得油份唔算好重。不過，有一點比較怪怪哋，佢哋魚生嘅溫度偏高，未至於暖，但就無咗份冰涼感。

三文魚 $18

三文魚嘅油脂唔錯，厚薄均一，順帶講埋飯粒，飯粒無再特別處理，亦唔喺暖身，夾起嚟有少少鬆散，但大細恰如其分，一口一件啱啱好。

赤身 $38

吞拿魚有拖羅或赤身部份可揀，眼底下呢件赤身色澤就較為暗淡，肉質結實卻未喺好細緻，食落有啲失望，仲要喺最貴嗰件。

Azuma卷 $88

用得店名梗喺稱得上招牌嘢，以軟殼蟹、青瓜、牛油果做餡，再添少少蟹籽做裝飾。咬落去軟殼蟹嘅柔韌、青瓜嘅爽脆，喺以合拍嘅感覺，只喺嫌牛油果太少，似有還無嘅感覺。

跟住要介紹嘅喺串燒，有11款選擇，唔止定價唔貴喎，比預期好食，做得有質素，可以講喺今晚最欣賞嘅菜式。

京蔥雞肉 $38

雞肉燒得帶點焦香，最正喺肉質嫩滑，富肉汁；京蔥亦燒得香，好有蔥香，又爽脆。

迷你甜薯 $28

細細粒嘅甜薯的的骰骰，咬落粉腍且滿滿薯香，陣陣清甜嘅蕃薯味，簡單製作，卻喺用料不賴。

沖繩煙燻豚肉 $58

最驚喜嘅串燒，無食煙肉咁肥，但入口又滿有油香，卻又甚有煙燻香氣，面面加咗點芥末絕對喺錦上添花。

喜之次一夜干 $128

爐端燒方面，我就介紹俾表姨甥女試試「一夜干」，因為「一夜干」做法頗特別，喺將鮮魚以味醂、醬油、鹽、糖……‥醃一醃，再風乾，話就話一夜乾，都唔一定要風乾成日，都喺視乎天氣、溫度、濕度，總之講求經驗。 真空空運過嚟，燒香之後再伴以檸檬、蘿蔔蓉及醬油就可奉客。外皮頗香脆，味道帶點鹹香，魚味明顯濃縮啲，口感有點挺實，但又唔喺話「嚡烚烚」咁。

茉莉花綠茶燒飯糰 $38

日本人晌居酒屋食嘢，都好鍾意臨尾整番件燒飯糰，加上以茉莉花綠茶入饌，增加可觀性。飯糰燒得外層焦香，咬落好有食飯焦嘅感覺，確喺有啲茶香味滲出嚟，感覺都真喺幾得意。

總括嚟講，佢哋嘅食物做得唔差，賣相亦相當精緻吓，燒物方面做得比較出色，定價個人就覺得稍稍偏高。可能新開張關係，有啲嘢好似準備未足，但服務算喺唔錯。

個人評分
味道：7/10
環境：7/10
服務：8/10
抵食：7/10
平均每人消費：HK$340

餐廳資料：
東鮨居酒屋 Azuma
西環西營盤第二街1-11號東祥大廈低層地下E號舖
2868 2669