米皇：黃牛山下快閃午餐

老實講，人生第一次入了嚟黃泥頭，點解會入嚟？咪行山囉，開始入秋，天氣都涼快咗，老死約我挑戰吓「黃牛山」、「水牛山」，當然奉陪啦，行呢啲先夠挑戰嘛。經過3.5小時行程，兜過大圈落番嚟黃泥頭巴士總站，正值食晏時間，當然最就腳就喺落去廣源邨嘅「廣源市場」搵食啦。

呢個市場集街市、熟食市場於一身，街市部份我哋就無行喇，一入門口見到好多檔口賣嘢食，有細檔口，有入鋪檔。行到攰，就梗喺搵家相對好坐少少架啦。

「米皇」絕對喺我哋嘅「求其」之選，都無刻意揀邊間，只喺友人想食清啲，我就最緊要要有杯凍飲，食反而喺其次。結果，隨隨便便中咗入去。

餐廳內嘅環境，簡單得嚟又見佢花咗啲心機，白色仿磚牆，襯以木系裝置。雖然枱櫈排得頗逼，但勝在樓底高，又唔會話好侷促。睇相就見，明顯有幾多街坊客人嘅支持。

本來都有影餐牌俾大家參考，不過，大本加反光，影得麻麻。取而代之，就索性掃描佢哋張外賣紙。長氣一句，食物嘅選擇有多款粥品、腸粉、炒粉麵、小食、多種套餐……等等。

郊外油菜 $13

友人喺健康人，自患過大病之後食嘢都好清、好健康，又成日做行動、行山。先嗌碟菜心墊吓肚，如果唔喺就我，佢連蠔油都會唔要。可能啲菜就晌街市攞貨，感覺寧舍鮮嫩。

魚片腸 $18

搵魚片做腸粉，我都喺第一次食，相對起叉燒、牛肉、鮮蝦、豬潤等見慣見熟嘅睇粉餡，魚片腸嘅味道真喺好清吓；雖然腸粉皮唔喺拉得好薄，但入口覺得滑溜，啲魚肉亦鮮甜。

西式扒餐 $36

雖則出身汗，體力勞動完成朝，但我哋都帶咗少少乾糧沿途食吓，所以，此刻又唔喺話特別餓，故此揀咗個所謂扒餐：雞扒配黑椒蘑菇汁、拼餐肉、跟厚多士。其實，澱粉質嘢唔多，份量「輕盈」，幾樣嘢食都叫OK啦，至少，雞扒唔會話好有雪味，個汁又幾香濃。

凍奶茶 +$2

一來夠冰凍，二來個茶底確喺幾香，有呢兩點都符合到小弟嘅要求架嘞。再者，夠大杯，夠晒解渴。

行山後話：上黃牛山、水牛山真喺唔易，要撐上600米高山坡，除山腳段上石芽背喺比較正規嘅梯級郊遊徑外，其餘絕大部分路段都喺半隱蔽小徑，雜草叢生，無行開山或做開運動嘅朋友，絕對唔建議行呢段。不過，攻到上頂，個景觀就真喺幾正，群山起伏，整個西貢景盡入眼簾。

上黃牛山、水牛山山徑，初段喺正規郊遊徑。

後段，啲路都喺人行出嚟，真正見步行步。

好有大地在我腳下嘅感覺。

西貢一帶全景

最後，食完午餐步出「廣源市場」，先發覺附近仲有啲大型少少嘅餐廳，地方仲好坐啲添。不過，既來之，則安之，又可以當喺支持吓啲小店嘅。如果再嚟，下次就會識搵食喇！

個人評分

味道：7/10
環境：6/10
服務：7/10
抵食：8/10
平均每人消費：HK$36

餐廳資料：

米皇
沙田小瀝源路68號廣源邨廣源市場37號舖
2761 3528