天然居海鮮酒家 Sam's Place：然之有物

又喺一年一度細妹嘅生日飯，過往幾年都喺就番細佬妹揀晌深水埗食，但今次就行遠多一個站，改晌長沙灣。而佢哋較鍾意食中菜，所以，就搵咗間商廈樓上嘅中菜館「天然居」。其實呢間酒家屹立晌長沙灣應該都有廿多年，因為，小弟十多年前就同啲夜校同學晌度搞過謝師宴，哈哈！

內裡嘅環境比較老式嘅酒家，無咩豪華靚裝，都喺少少街坊酒樓格局，但就勝在地方四正，乾淨企理，而且，掛上幾部大電視，俾啲街坊茶客一邊食飯，一邊追劇，目測所見，睇到唔少客人都似喺街坊客。

菜式選擇方面，睇到張小菜紙就更感覺喺好街坊，簡單嘅色紙印刷，底面兩版，就大致上羅列晒各類小菜、燒味、是日靚湯、啤酒、汽水……等等。

仲有另外兩張細餐牌紙，喺啲餐前小食、特價精選、各款孖寶、套餐及海鮮……等等。晌特價精選中，見$98一隻燒雞，真喺無理由唔點。

順便講講，茗茶收$12位，酸菜$10一碟，所以，眼前呢碟花生成10蚊架。

粟米魚肚豆腐羹 $88

先嚟一鍋粟米魚肚豆腐羹，嘩！勁大鍋，每人至分到兩大碗有多，出嚟嘅質素一啲都唔失禮，兼且勁多料，粟米、魚肚、豆腐樣樣都多，最緊要喺個質感煮到啱啱好，唔會太杰或太稀。

豉汁帶子蒸豆腐 $98

細妹對唔少海鮮有敏感，但帶子就絕對放心食，一客有8件，剛好一人食兩件。帶子爽口鮮甜，豆腐又好嫩滑，配以惹味嘅豉汁，基本上都無乜點衰，而啲豉汁用嚟撈飯又正喎。

天然小炒皇 $78

炒菜方面，細妹就揀咗小炒皇，話貪佢夠香口喎。咁的確又喺嘅，以魷魚、蝦乾、豬油渣爆炒啲韭菜花，蝦乾就有嚼頭，韭菜花就爽口，食起嚟有多種口感。

南乳脆燒雞 $98

至於個特價精選燒雞，真心一句：堅抵。初頭都諗，賣咁幾價，會唔會將貨就價喺隻細雞嚟？睇相你都見唔喺啦，而且，炸得外皮平均有光澤，傳出陣陣香味。入口真喺真材實料，啲皮脆到咯咯聲，皮下脂肪少，雞肉極之嫩滑，伴以南乳醬，好食到不得了。如果晌其他出名啲嘅餐館，賣二百零蚊都喺正常事啦。

紅豆沙（免費）

估唔到，只喺嚟食餐便飯，晚市都有糖水送。雖然只喺紅豆沙，但用足料，啲紅豆沙唔會水汪汪，而且，紅豆粉香清甜。

加埋幾個白飯（$12碗），連加一，埋單都喺五嚿水落樓，平均每人都喺百鬆啲，喺好抵食嘅一餐。再者，啲餸菜啱晒細佬妹同我老婆食，啲招呼又唔錯喎，有個後生哥仔都幾有禮貌架，所以，我哋都覺得成晚都食得好稱心。

個人評分
味道：8/10
環境：7/10
服務：8/10
抵食：9/10
平均每人消費：HK$125

餐廳資料：
天然居海鮮酒家 Sam's Place
長沙灣元州街296號西岸國際大廈3樓
2387 7220