港口味冰室 Hong Kong Taste：港口味，即喺本土味！

近年咩都講「本土」，政治、民生……無咩邊樣唔涉及。而講到語言，小弟一向都力撐廣東話架，睇我啲食評就知啦，廣東話口語化寫作，有親切感嘛，更盡量唔會夾雜任何無必要嘅外語，若寫到又中又英，只怪自己詞窮未夠料。但一講到飲食，雖然粵菜好代表到廣東人，但點都唔及茶記咁本土。早排晌長沙灣「百匯軒」食家族飯，就路經見到有家茶記「港口味冰室」，鋪面白底紅字，無大玩懐舊，但就有種本土意識形態，點都要搵日試試。

晌門口有塊小黑板，寫住啲精選菜式，感覺取價公道。

走入餐廳內，一室白磁磚牆，光猛整潔，又配點摩登嘅吊燈。左右兩排都喺4人座卡位，中間就2人座散枱，但不時搭埋啲卡位變6人枱。聽啲客跟店長對話，就知大部分喺附近嘅街坊嚟，當晚就見有唔少咁「搭枱」嘅情況出現。

枱上已貼有基本餐牌，如茶記慣常見到嘅快餐、特餐、常餐，仲有款順應吓潮流嘅全日早餐添。

另一張餐牌就喺各式碟頭飯，分開多款系列，如店家嘅精選推介、皇牌咖喱、特式湯粉麵……等等。

另外仲有一張散起嚟嘅餐牌，分別一版喺主打小菜嘅，十多款小菜，除招牌海南雞外，定價都喺$65 / $68，加多$6就配熱飲或餐湯，跟碗白飯。

其餘嗰版就喺街坊晚市套餐，有街坊孖寶、3人餐、3人餐，咁就可以砌出唔同人數嘅配搭，而且，定價都好相宜。

一向嚟茶記就梗喺飲奶茶啦，不過，呢度都有啲特飲啱我心水，就喺奶茶紅豆冰喇，如果跟餐補$7就試到，而我哋散嗌，補$12一樣可以試到。

港式茶走紅豆冰 +$12

茶記嘅奶茶唔知點解，感覺寧舍滑，茶底亦香，再配以大大粒飽滿嘅紅豆，又腍又清甜，好飲。

懷舊菠蘿冰 +$12

相反，雖然杯菠蘿冰喺懷舊做法，不過，又真喺普通咗啲，如果改用雪碧代替清水，感覺性價比高番啲。

招牌海南雞（半隻）$98

半隻雞嘅份量都好足，仲伴有少少開胃嘅酸菜。雖然，無刻意問喺咩雞種，但確喺幾有水準，啲雞肉超滑溜，有雞肉味，皮下脂肪少，所以，就連啲雞皮都好爽口。奉上嘅兩款醬汁：黑醬油及辣醬，前者夠濃稠，後者有辣勁。

黑松露沙拉一字骨 $68 

呢一款小菜喺店長極力推介，話唔少客都讚好，所以，我哋又即管點一客嚟試。一客有6大件一字骨排，每件都沾滿沙律醬，但啲沙律醬唔會推得太厚身，薄薄一層包住條骨，所以食落酸酸甜甜，又唔會太漿口，而睇樣你都見，每條骨都搽咗一大撮黑松露醬，故此，勁有松露香，再者，啲骨排肉質又夠鬆化，整體確喺幾好食。

始祖椒鹽豬扒飯 $53

因為我哋一早打算叫呢款碟頭飯，所以，海南雞及一字骨都刻意無配白飯。雖然我都唔喺好知點為止喺「始祖」，不過，啲椒鹽豬扒確喺好食，一來炸得香而不油膩，同埋椒鹽味啱啱好，仲添加咗金蒜，變得更惹味，再者，份量十足，啲豬扒好似食極都有，又碎上，方便大家夾嚟食；二來配以炒飯底，功夫都多一重啦，兼且飯底炒得爽身，夠晒香。

食完幾道菜式，明白點解有咁多街坊幫襯啦。聽店長講，佢哋仲有唔少好食嘅出品，如咖喱、炒滑蛋、蒸魚，我哋人少試唔得幾多。反而，下次再嚟，真喺想試試佢哋個「榛子醬西多士」，光聽個名都有啲賣點。順帶提吓啲服務，茶記地方，一向都唔太講服務，但啲阿姐又真喺幾有禮貌，上菜後都講句多謝晒；我哋食完喇，幫我哋執清張枱（剩低啲嘢飲），就加句慢慢坐。

個人評分
味道：8/10
環境：7/10
服務：8/10
抵食：8/10
平均每人消費：HK$81

餐廳資料：
港口味冰室 Hong Kong Taste
長沙灣元州街409號地下
5966 9181