我哋被安排晌5樓用餐，對外兩面都喺落地大玻璃窗，採光度十足，陽光太猛時，店員都好醒目會拉拉窗簾擋擋光。由於喺單幢樓，每層面積唔大，眼見都只喺12個位，裝修簡約，木地板，配以帶金屬嘅裝飾，完全感覺唔到晌一幢舊唐樓內，顯然都花過心思去打造。
我哋兩個人，正好窗邊位有二人座，望落去，有少少街景景觀。由於每層地方唔大，頗適合小型包場搞活動，事後問過店員，佢哋亦有提供包場服務，但就無再詳問細節喇。
由於廚房設晌地下，無理由吓吓啲食物由侍應從地下捧上去架，小弟啱啱坐晌「服務間」前，就見到專門運送食物用嘅升降機，已經好耐無見過呢啲設備喇。
嚟食晏，基本上有兩個選擇，一喺快快手只有一道主菜嘅Express Lunch（$68），一喺就享受好啲4道菜再包埋啡茶嘅Business Lunch（$208）。
不過，仲想嘆啲，無問題，友人特別安排咗個精選午餐（$480），同樣喺4道菜，包餐飲，但用料更精。
Focaccia
由店員倒下橄欖油及黑醋後，轉頭就送上自家製麵包籃，細心用白布冚住保溫。雖然無問麵包喺咩名堂，但食落似喺加咗黑橄欖嘅意大利香草包（Focacia），入口面層脆脆哋，包心就好鬆軟。沾上油醋，簡單好食。
Parma Ham, Serrano Ham
頭盤喺兩款唔同產地嘅風乾火腿，前者喺意大利嘅巴馬火腿（中間捲起嗰埋），後者喺西班牙嘅山區火腿（平放嗰一大片），兩者各有特色，鹹香緊緻，而山區火腿就稍為再油潤啲。將火腿捲住已焦糖化嘅無花果，再沾少少松露蜜糖醬，嗰份鹹與甜嘅交融，令味道嘅變化確喺好微妙、好豐富。
Risotto
呢一道有啲似喺法國菜嘅小主菜（Entree），因為份量唔少，又安排晌主菜之前。咪睇個樣好似普普通通，食得出甚高水準，一來米粒口感煙韌好對辦，二來做得濕潤而充滿芝士香味，三來飯內混有帶子及龍蝦肉，自然美味升級，再者，比一般意大利無咁「漏」，多添份清爽感，皆因放咗啲意大利青瓜入飯內。
Chicken Roulade
法式雞卷可以講喺經典法國菜之一，以法國春雞肉嚟做，雞肉本身已經好夠嫩，加上師傅煎得恰到好處，所以，食落啲肉質感到無比柔嫩；而雞肉捲住鵝肝醬、野菌，又沾滿松露油，入口嗰份幽香、綿滑感，非常突出。此外，伴菜亦有心思，意大利青瓜及黃瓜都裁到細細件，一口一小件，仲有啲初時以為喺薯仔，咬落腍腍哋，又帶點爽口，再細看先知喺淮山嚟，真特別。
Baked Ocean Sea Bass Fillet
至於呢一道烤鱸魚柳，賣相就真喺極富特色，以耐熱玻璃紙袋起成份鱸魚，其實，曾經晌佐敦一家鐵板燒店見過呢種玻璃紙，當時已覺得好神奇，因為，竟然可以直接放晌鐵板度加熱。甫剪開袋口，蕃茄嘅香氣已立時湧出，然而，鱸魚出奇地保持皮脆肉嫩，魚味濃郁，喺具質素嘅魚柳；而驚喜喺底下仲有其他海鮮料：魷魚圈、大蜆，均喺靚料，入口富鮮味。
Coconut Panna Cotta
兩道精彩嘅主菜後，就喺甜點，甜點喺意式奶凍嘅加強版，賣相清爽。先喺奶凍加入椰奶，既有奶香，又有椰香，只喺質感略嫌有丁點實；而伴碟嘅唔喺「求其」擺啲生果，而喺用上煮過嘅鮮菠蘿粒及橙肉，酸酸甜甜之下，更托出奶凍嘅香濃奶味。
即磨咖啡、熱檸檬茶
晌上甜品前，先嗌埋餐飲，襯甜品小弟十居其九都喺叫咖啡，簡單一杯即磨咖啡，送上嚟嘅奶都喺有加熱嘅，一小口奶凍，一小啖咖啡，都喺段餐後美妙時光。
整個午餐嘅用料、烹煮手法都非常高水準，而且，菜式豐富。不過，我哋都不約而同覺得實在「豐富」過頭，如果將意大利飯份量減半，再晌呢道小主菜之前，加一客餐湯，伴伴麵包，就更理想。另外，用餐環境清靜，服務又熨貼用心，讓人都用餐好稱心。
個人評分
味道：9/10
環境：8/10
服務：9/10
抵食：8/10
平均每人消費：HK$530
味道：9/10
環境：8/10
服務：9/10
抵食：8/10
平均每人消費：HK$530
餐廳資料：
Le q Cafe & Bar
中環皇后大道中129號
2110 4668
Le q Cafe & Bar
中環皇后大道中129號
2110 4668
沒有留言:
發佈留言