意樂餐廳 Cafe de Itamomo：意樂，樂意再嚟！

無耐之前，先嚟過曼克頓山嘅「Pacific Coffee」食早餐，都無為意樓上嘅「759阿信屋」由大鋪變細鋪，而騰番出嚟嘅鋪位變成兩家餐廳，一家喺賣西餐，另一家喺賣東南亞菜。作為美孚街坊，要過嚟試試嘅，今晚兩公婆，拉埋姨仔，先試前者「意樂餐廳」。

環境一睇就知喺款走工業風，水泥地、鐵窗框、昏暗燈光、木枱木櫈，加上無乜修飾嘅天花，帶出一種粗獷原始味。

有一套揭頁嘅基本餐牌，所提供嘅菜式應喺全日供應，類別分為意大利麵、意大利飯、西式或和風珍珠飯、烤焗類、黑松露菌類、滑蛋蓋飯、小食、濃湯、沙律、拉麵、甜品及飲品。其實款式都有別常見嘅大路嘢，有唔少混合創作菜式，整體而言，選擇唔少。

此外，仲有啲特色晚餐之選，如加拿大安格斯牛扒、西班牙豬鞍扒、秘製咖喱雞、比薩……等等，有晒圖片作參考。

順帶一提，點選主食，都有飲品半價、甜品加配優惠。

枱邊早已放齊餐具及基本調味料，小弟都唔喺第一次講，就喺幾鍾意呢個做法，需要多用啲刀叉時可以即時有得用，唔使吓吓專登煩店員，費事失事。而且，個胡椒粉及鹽樽都好得意。

柚子蜜味芝麻烤雞翼 $30

一客有4隻，雖然話喺烤雞翼，但點睇都似喺烤，入口一食就食得出喺烤嘅添，但無論烤好定烤好，賣相金黃，糝滿芝麻，都吸引啦！再者，柚子味幾重，又有點芝麻香，確喺幾好食。

意大利雜菜湯 +$9

老婆一向喺意大利雜菜湯嘅忠粉，既然可以加少少錢配，佢就一定唔會錯過啦。咪睇個湯平平無奇，其實，飲落好香濃，但比偏辣偏酸嘅羅宋湯會溫和啲，卻喺好有菜蔬嘅鮮甜味。

帆立貝海鮮意大利蕃茄濃湯扁意粉 $62

湯底喺配意大利蕃茄濃湯，但咪以為即喺上述分享過嘅意大利雜菜湯，我哋再細心試，色澤就好似，但分別到喺兩隻味道嚟，呢個蕃茄更濃郁、更酸活；麵條煮得恰當好處，有咬口，而且，份量都真喺唔少；至於海鮮側有帆立貝、青口、鮮蝦及魷魚，唔算好高質，亦絕對唔差，至少都有啲鮮甜味吖嘛，青口又唔會韌到擦紙膠咁。

野菌田園比薩 $62

老婆第一眼就睇中呢個比薩，因為全素嚟，以車厘茄、粟米、紫洋蔥、雜菇、菠蘿做餡料，啱晒佢。比薩嘅大細喺直徑9吋大，厚度就介乎薄批與厚批之間，咬落唔算好特別，勝在口感算喺鬆軟，而餡料就落得無手緊，味道清新，喺嫌野菌少咗啲，但芝士就堅多，鋪晌面遮晒所有餡料。

熱胚芽好立克 $11

姨仔就要咗杯好立克，就算加咗胚芽，都唔會有太多特別嘢講，喺添多份營養。

抹茶牛奶紅豆冰冰 $11

依家晌啲扮懷舊嘅茶記已經有款奶茶紅豆冰，當然比傳統只加入奶水嘅好飲，而今回就加入抹茶牛奶，味道果然好唔同，亦喺好爽，抹茶有茶香，啲紅豆又腍又甜。

總結而言，「意樂」嘅食物多元化，質素唔喺話好高，但試咗幾樣嘢都唔差，定價亦都親民，環境有個性，況且，美孚好食而又相宜嘅西餐廳唔多，所以，值得翻兜。

個人評分
味道：8/10
環境：7/10
服務：8/10
抵食：9/10
平均每人消費：HK$62

餐廳資料：
意樂餐廳 Cafe de Itamomo
美孚寶輪街1號曼克頓山曼坊商場1樓101C, 104&107號舖
2650 9100