漁樂 Lime Fish：東南亞午飯，快上快樂！

星期六我哋好多時都喺出街食早餐，午飯就留晌屋企煮；今次就相反，朝早就晌屋企煮早餐食，晏晝飯就近近哋落去曼克頓山嘅「漁樂」搞掂。正正因為上次去過「意樂餐廳」，見隔離呢家「漁樂」新開無耐，又幾多人幫襯，故此，有啲興趣嚟試試。

環境同隔離嘅「意樂餐廳」幾相似，地下鋪上花磚，裝修帶點工業風嘅感覺。

晌門口已見到大大隻霓虹光管字寫住「Asian Food」，所以，翻一轉餐牌，就見有唔少不同東南亞國家嘅菜式，單以午餐而言，選擇十分之多。而所有菜式都包基本餐飲，但亦可以加錢轉為特飲，或配小食、配甜品。

順帶一提，基本餐具都已經放晒晌枱面，自由取用。

越香扎肉魚片頭湯河 $49

老婆一向喺湯米、湯河支持者，見佢有條「魚仔」標誌，應該喺廚師推介之類啦。份量就好夠喇，仲鋪咗唔少紫洋蔥及金不換添，扎肉及魚片頭都交足貨，前者幾爽口，但後者似一般炸魚片，非魚片頭，還好嘅喺幾爽，有魚味，河粉亦夠滑溜，湯底就普通啲，幸好無偏鹹嘅問題。

泰正金不換炒金邊粉 $56

以小煎鑊盛載，幾有心思，但最特別喺配料，初睇表面，有啲辣椒乾、花生碎、青檸、沙糖放晌4邊，加上粉內有點豆腐乾及泰國臘腸，算預3弟見識少，呢個配搭我都喺第一次試，整體味道都唔錯，紛陳有個性。事後先知原來喺曼谷啲小巷風味，話時話，我真喺未去過泰國旅行喎。

特濃即磨咖啡、熱好立克

今次就無特別想轉特飲，簡簡單單，我就揀杯咖啡，老婆就飲好立克。原來，佢餐牌上寫住「特濃」即磨咖啡，送到嚟就知咩事，喺即磨咖啡再加一小羹即溶咖啡粉，咁就當然濃郁啲啦，但不失醇香，枉佢又諗得出喎，哈哈！

今餐算喺快上快落，眨眼食完餐晏。招呼不過不失，但至少唔會無禮貌，上菜快，食物嘅味道亦OK。雖然呢區有兩家越南餐廳「小越南」及「越棧」，但賣東南亞菜就得間極之麻麻嘅「牛車水」，相信無太直接對手下應該有得做。

個人評分
味道：7/10
環境：7/10
服務：7/10
抵食：8/10
平均每人消費：HK$53

餐廳資料：
漁樂 Lime Fish
美孚寶輪街1號曼克頓山（曼坊）1樓101C, 104&107號舖
2174 7100