Marine Seafood Bar & More：意菜之夜

都好幾個月無嚟觀塘食飯喇，其實，觀塘區不乏有質素嘅餐廳，尤其晌廠廈之內，不過，食完返屋企要搭鐵鐵兜個大圈返美孚就硬喺覺得有啲耐。難得同親友嘅飯局，走遠啲都無所謂啦。

「Marine Seafood Bar & More」位處駿業街新商廈之中，距地鐵站話遠唔遠，話近亦唔數近。走進餐廳，環境都幾大，樓底相對一般餐廳高，枱櫈嘅放置亦無用到盡，所以，有一定嘅空間感。而裝修帶點歐陸風，襯以昏黃燈泡，令整體感覺舒適。

晌門口已見到大大生蠔嘅大特寫，加上餐廳名字加入Seafood，就知道生蠔及凍海鮮喺店家嘅主打之一。主餐牌中，就睇到提供多款嚟自各地嘅生蠔，由$9-$49 / 隻，正所謂豐儉由人。更有生蠔拼盤、生蠔配餐酒、海鮮拼盤嘅抵食之選。

唔食得生蠔、凍海鮮？OK，無問題，有焗蠔供應，更有一款啤酒配吉列海鮮套餐俾客人選擇。海鮮以外，仲有埋時下甚大熱嘅斧頭扒，食肉獸嘅朋友唔使擔心無嘢揀啦。

而主餐牌裡面，其他嘅選擇仲有餐湯、前菜、意大利麵、意大利飯、薄餅、漢堡、主菜、甜品……等等。結果，今晚我哋無食蠔或海鮮，但就成了意大利之夜，點嘅都喺意大利菜式。

最估佢唔到嘅喺，明明喺間西式海鮮餐廳，竟然有刺身盛、壽司盛、丼飯添。

輸到介紹飲品喇，食生蠔又點會無白酒襯吓架，此外，一系列紅酒，以及香檳、啤酒、手工啤、汽水、果汁、啡茶都有。

凱撒沙律配巴馬火腿 $88

如果單點一客凱撒沙律只喺賣$68，但加巴馬火腿就另加多$20。個沙律睇落好飲5好普通，但啲醬汁撈落羅馬生菜度極之均勻，生菜又脆到索索聲，麵包粒喺用上烘脆嘅蒜蓉包，更用上即刨巴馬臣芝士，誠意十足。雖然啲巴馬火腿未夠油潤，但都算鹹香好食，況且，只加廿蚊算喺俾得量多喎。

忌廉茄汁蟹肉意大利飯 $118

我成日都話，意大利麵及意大利飯，最能夠睇到師傅嘅手勢，今回個意大利飯好食，飯粒被醬汁包勻，充滿蕃茄及香草香，而且，混有唔少蟹肉，唯一挑剔嘅喺飯粒有些微煮過火，煙韌感唔夠強。

芝士四重奏薄餅 $99

原本最想試喺松露牛肝菌薄餅，但可惜是晚無供應，不過，芝士四重奏薄餅都有啲興趣。以莫沙里拉、巴馬臣、布利、 乳清芝士四種芝士混合鋪晌批面，嗰份芝士香真喺無乜點輸。反而，薄餅嘅厚薄我個人就覺得唔太討好，因為佢未至薄到餅乾底，但又未至厚到麵包底嘅感覺，所以，出嚟嘅效果會令薄餅邊位變得少少乾同韌身，令整體打咗少少折扣。

甜品拼盤 $58

甜品只有一個選擇，並以拼盤形式，只賣$58就有3款迷你甜點，試得過吖！細評嘅話，最好喺藍莓芝士餅，做得軟滑富芝士香；雲石芝士餅就加入太多朱古力漿，令整體口感實咗；而布朗尼夠濃朱古力味，質感夠挺，但如加入合桃就夠正宗，兼口感更豐富。

如果叫生蠔、食海鮮、嗌份扒，當然使費過好多啦，但好似我哋咁，點吓意大利嘢，叫三幾碟，平均每人二百唔使，都稱得上划算。題外話，初時啲招呼麻麻，有個女店員見到我企晌門口，都繼續同客人（可能喺熟客吧）傾偈，完全無視我。不過，有個肥肥哋嘅疑似經理就醒目好多，招呼熨貼，明顯喺做餐飲好有經驗，落完單識留起甜品，見我哋食完主菜，就識自動安排上甜品，唔使我出半句聲，抵讚。

個人評分
味道：8/10
環境：8/10
服務：7/10
抵食：8/10
平均每人消費：HK$200

餐廳資料：
Marine Seafood Bar & More
觀塘駿業街52-56號中海日升中心1樓A舖
2168 4222