農場鮮奶有限公司 Farm Milk Co. Ltd.：零難度山徑、清幽小水塘、鮮到爆鮮奶半日遊。

「農場鮮奶有限公司」聽聞過唔少啦，不過，位置吊腳，唔會無情白事走嚟，最近，晌網上搵啲好行嘅行山路線啱我老婆行，就搵到條零難度嘅路線，由石崗嘅「雷公田村」行到去「清潭水塘」，易行、路程唔長、多樹蔭、有啲景，正正又路過「農場鮮奶有限公司」，點都要嚟飲吓佢哋嘅鮮奶啦！

門口無任何招牌，因而不少人過門不入走晒雞，而門口巨型嘅「黑白乳牛大石」就喺其標記。走入去，石屋、小型農圈，可以參觀嘅地方就一眼睇晒。

場內有一紮紮嘅草供遊人買嚟餵羊，當日所見，唔少家長會帶啲細路嚟餵吓羊，就算你無草晌身，行埋個圍欄度啲羊都慣性走過嚟，所以，幫佢哋影張大特寫喺無難度。

用餐地方放咗好多膠枱膠椅，呢度零服務，自己照顧自己，但最得意喺牆身油埋黑白乳牛花紋，好襯周圍環境呀！

雖然一早以飲鮮奶為目標，但都介紹吓仲有咩食，亦順便更新吓個價錢俾大家知。主打嘅喺以下呢堆，百份百純鮮奶、薑汁撞奶、燉奶……等等。

此外，飽肚嘅熱食有餐蛋一丁、五香肉丁一丁、魚肉燒賣、茶葉蛋……等等。

溫馨提示，呢度只開星期六、日及公眾假期，仲有，人哋只喺做盤小生意，不設開水、不設額外餐具、謝絕外帶食物、謝絕濫泊，大家就要尊重吓。

百分百純鮮奶半公升（全脂）$16

因為我哋食完早餐先嚟行，所以，就唔幫襯佢啲麵食喇，但純鮮奶就肯定要試。紅白紙盒包裝，絕對喺80、90年代鮮奶嘅標記，半公升嘅只有全脂，小弟就乜脂都無問題，由於喺鮮製，無防腐，無添加，所以，食用期得3幾日。飲第一口，先喺冰涼，繼而牛奶嘅純鮮味一湧而出，堅喺好新鮮嘅感覺，口感絲滑，點聽我噏都無用，飲過你就知。

薑汁撞奶 $21

老婆就唔喺太飲得新鮮牛奶，不過，薑汁撞奶就超啱佢，尤其薑汁系食品。講到明喺即叫即製，需等上3-5分鐘，所以，初時仲喺水汪汪，之後，再搖吓佢，睇住佢凝固起嚟。啲撞奶比出面食嘅會削身少少，唔知會唔會因天涼關係有影響，但口感確喺好滑溜，瀡一聲滑落喉嚨，好香奶味，但又有薑汁嘅辛辣，但辣得溫和、平衡，老婆大讚好食。

順便分享吓今次條零難道行山徑，由於近乎全程都喺沿引水道行，所以，絕大部喺平路，只有少少上落斜，唯一唔好喺佢本身喺入去其他村嘅車路，間唔時有一、兩架車經過。行到入清潭水塘，非常寧靜，好舒服，全程齋行大概一小時。而退路一喺就回程出番雷公田，一喺就好似我哋咁，繼續行，再由小路落返錦上路一帶，有巴士、小巴去錦上路、元朗，過大埔。

清潭水塘

趁放假，遠離吓石屎森林，走過嚟輕鬆咁行吓，親親大自然，感覺好舒服。當然，如果倒轉行，由大欖嗰邊過嚟，以雷公田為終點，就可以臨完結前到「農場鮮奶」歇一歇就更正。

個人評分
味道：9/10
環境：6/10
服務：6/10
抵食：8/10
平均每人消費：HK$19

餐廳資料：
農場鮮奶有限公司 Farm Milk Co. Ltd.
元朗石崗甲龍村雷公田78號
2832 9218