魚米 Yu Mai：魚不可及

兩公婆是夜探完老爸，順道落到深水埗福榮街搵食，因為眾所周知，呢條街已經變成為食街，短短兩截街，唔使數，食肆都超過廿間。就番佢口味，又想食得清啲，更唔會揀啲要排隊嘅人龍店，所以，走咗入「魚米」，我哋都曾經幫襯過，知道間嘢都唔差。

簡單嘅裝修，光猛醒目。時為9:00pm有多，客人唔太多，梗喺揀有張卡位，比起坐二人枱舒服啲。

原條鮮魚米線喺佢哋嘅主打，但因為大家都好肚餓，餐牌都無乜點研究，好隨意晌「鮮魚湯自選米線」一欄揀選自己喜歡嘅款式，無論揀咩款式，已附有少量芽菜、腐皮、韭菜、榨菜（餐牌寫咗「炸菜」）。

鮮蝦韭菜餃米粉 $37

老婆鍾情米粉多過米線，自不然轉食米粉，佢話份量好多，幾乎食唔晒。的確，米線鋪賣嘅米麵比起港式麵檔嘅份量真喺有多一倍。

一客有4大粒鮮蝦韭菜餃，粒粒都包得好飽滿，入口味道其實都唔錯，不過，鮮蝦好少，感覺豬肉好似仲要多啲，最弊喺有啲淥唔熟嘅情況，有啲肉喺生嘅。埋單時先同收銀姐姐反映，佢話應該即時同佢哋講，換過一碗，可是因為食咗大半先發現，就覺得無謂搞咁多，結果佢好好人免咗我杯冬瓜茶。

帆立具米線 $37

做米線嘅通常都唔講賣相，都喺比較粗枝大葉，以下喺送上枱嘅實物模樣。

被小弟執番啲帆立貝出嚟，個樣喺味吸引啲呢？雖然叫帆立貝，賣嗰37蚊雞，都有心理準備唔會喺咩高級貨，呎碼比較細粒，但一客有5粒，算OK啦！味道不過不失，算唔上好鮮甜，亦未至於一朕雪味，講唔上好爽彈，但亦無話韌到擦紙膠咁。反而個魚湯底不俗，有份鮮甜，米線亦喺幾滑溜。

凍冬瓜茶 $10

兩啖熱辣辣米線，一啖清涼冬瓜茶，夠晒爽，冬瓜茶清潤微甜，比起飲汽水就梗喺健康好多啦。

整體味道不俗，相信「鮮蝦韭菜餃」喺個別事件。晌服務一欄評分秤高少少，唔喺因為佢免咗我杯冬瓜茶，而喺食物有問題時，佢哋態度喺有承擔，肯負責，就算好似我哋埋單先講，佢哋都會作出補救方案。出面唔少食肆聽完你講就算，話會跟進都喺流流哋，有啲更認為你呃佢想攞着數而話番你轉頭添，查實喺愚不可及嘅取態。

個人評分
味道：6/10
環境：6/10
服務：8/10
抵食：8/10
平均每人消費：HK$42

餐廳資料：
魚米 Yu Mai
深水埗福榮街115號地下
2387 0818