四小拼（肴肉、小排骨、烤麩、脆鱔）$103
由於小弟遲到，朋友就先點呢道冷盤邊食邊等，相片都喺由L君幫手影低。呢道喺小弟心水推介嘅冷盤前菜，一來可以一次過試到多款冷盤，二來脆鱔真喺好特別。賣相樣衰嘅脆鱔入口脆卜卜，酸香開胃；小排骨如平常食到嘅糖醋骨，肉質倒算做得鬆化；烤麩軟綿而吸滿醬汁，食落煙韌咬口；肴肉晶瑩的骰，口感爽滑有嚼頭。
魚籽煙燻蛋 $20 / 隻
燻蛋又喺試過覺得好，推薦大家一試，我哋6個人，點3隻就啱啱好。賣相吸引，金黃半凝半黏嘅蛋黃，蛋香濃郁又有種溏心效果，配上鹹鮮黑魚籽，食味一流，而蛋白爽彈又略帶煙燻味，好食。
雞絲拌粉皮 $68
將雞絲、青瓜絲及粉皮跟麻醬拌勻，口感豐富，味道香濃，粉皮好軟滑，而且，師傅無手緊，俾咗唔少雞肉，唯一挑剔喺個醬杰身咗，比較黏口而已。
336上海小籠包 $38
嚟食滬菜，唔試吓店家嘅小籠包就好似硬喺差啲啲咁。雖然摺紋未話去到十幾廿摺咁誇，但外皮都搓得夠薄，肉饀鬆軟富肉汁，整體味道唔錯。下面墊咗片超薄白蘿蔔片，防止黐住個籠底，夠細心。
婆婆生煎包 $38
一客有3個，包面沾滿黑白芝麻，個個飽滿大隻，包底煎得甘香鬆脆，咬落唔黏牙，而內裡豬肉餡搓得鬆化唔死實。
韭黃炒鱔糊 $103
上海菜特色喺濃油赤醬，炒鱔糊就喺其中一道代表作。鱔糊炒得極之惹味，個醬亦好香濃，而且，份量十足，碟內有好多鱔肉。
露筍炒百合 $78
睇起嚟喺一道好簡單嘅菜式，確實，做起嚟難度唔大，但勝在用料不賴，露筍爽口，脆嫩無渣，而鮮百合十分清甜。
素三色冷麵 $55
依道菜其實喺點錯咗，友人本身喺想食湯嘅素麵，不過，如果叫素麵就會嚟咗依個冷麵。OK啦，我哋都無所謂嘅，撈勻啲材料，入口又幾清爽，好適合遲啲夏天嚟食。
上海炒年糕 $78
上海菜有唔少特色嘅炒粉麵，上海炒年糕喺其中一款經典，雖然唔喺用咩貴價材料，但炒得味道香濃，年糕煙韌有咬口。
婆婆擔擔麵 $52
除炒年糕，擔擔麵相信都可以稱為另一款經典，睇起嚟似喺普通，確實用料、做法都喺簡單，但麵條夠韌性，浸耐咗都唔會腍晒，個湯濃郁帶花生香味，而且，夠辣勁。
豆沙窩餅 $50
今晚好似懷舊之夜，所點嘅菜式都較傳統，豆沙窩餅就喺其中一款老式嘅上海甜點。一客切成8小件，餅皮炸得金黃，入口香脆唔油，內裡填滿豆沙，清甜好味。雖無驚喜，但好食。
香蕉高力豆沙 $52
小弟就特別喜歡高力豆沙，一客4球，個個做得漲卜卜，外層灑滿糖霜。店長知我哋共享，幫忙一開二，食落粉糰極之軟綿，內裡夾雜香蕉與豆沙，綿滑滋味。
南瓜餅 $45
南瓜類甜點亦喺小弟嘅心水，一客4件， 炸得金黃均勻，餅皮軟綿煙糯，又唔黏牙，淡淡南瓜味，襯晒啲豆沙。
翻睇自己嘅食評，對上一次光顧原來都已經喺3年前嘅事，今次再訪，雖然都喺點啲傳統上海嘢，但水準都無乜跌到，服務又到位。由於今次無影個菜牌，無得跟以前比較，但印象中菜式無點變，但可以肯定嘅喺，茶錢仲喺收$6位，部菜式都喺輕輕加$1、$2。
個人評分
味道：8/10
環境：8/10
服務：8/10
抵食：8/10
平均每人消費：HK$165
味道：8/10
環境：8/10
服務：8/10
抵食：8/10
平均每人消費：HK$165
餐廳資料：
上海婆婆336 Shanghai Po Po 336
尖沙咀彌敦道63號iSQUARE國際廣場6樓605-606號舖
2806 1833
上海婆婆336 Shanghai Po Po 336
尖沙咀彌敦道63號iSQUARE國際廣場6樓605-606號舖
2806 1833
沒有留言:
發佈留言