喜越 I'Annam Banh Mi et Pho：賞心越目

真喺隔咗好一段長時間先約得成呢餐飯，原意喺舊年去完一轉台灣嘅花東，友人想搵我分享嗰次旅行嘅點滴，由上年尾到依家，唔喺我唔得，就喺對方唔得，總之約嚟約去，結果，事隔半年先約得成，都真喺有啲誇張。點都好，成事就好啦，地方就由朋友揀，佢話想食越南嘢，投其所好我就無所謂。

「喜越」我都喺第一次嚟，唔止門面裝修得幾特別，內裡都幾骨子，店內地方唔大，一室白色為主調，佈置簡約，餐廳尾一大幅黑白越南少女畫作可謂全店亮點。

翻翻餐牌（只喺細細張底面兩頁），印刷簡而精，且圖文並茂，4款越式湯河粉、5款越式撈檬粉、3款越式法包、10款越式小食及5款飲品，雖然食物選擇唔多，在乎貴精不貴多吧！不過，字粒有啲細，老花嘅朋友真喺要花點眼力。

扎肉蒸粉卷 $48

粉包一客有4件，做得的的骰骰，灑上點炸魚乾，伴有幾片紮肉，粉包嘅外皮真喺唔錯，既薄且滑，薄到透出裡面嘅餡料，而內裡塞滿肉碎、木耳、甘筍，好有口感，沾啲魚露感覺就更鮮。扎肉質感柔軟而爽彈，味道都唔錯。

手撕牛肉法包 $62

越南法包都算得喺越南菜有代表性食物之一，店家有3款口味供選擇，我哋就應店長嘅推介，揀咗「手撕牛肉」。果然，啲牛肉好鬆化，配合埋啲酸蘿蔔、蛋黃醬、豬肝醬、芫荽，令味道更豐厚。而件法包亦有別正式嘅法包，無咁硬身巉口，鬆軟好食。如果講到心水越式法包，反而諗起佐敦嘅「馬丁王」，因餡料更豐富並多樣化，做法正宗。

燒豬肉撈檬粉 $68

啲檬粉份量頗大碗，除咁淋上魚露，亦伴有一小碗清豬骨湯，用作淋落啲檬度食，變相試完撈檬，就可以食湯檬。將所有材料伴勻，增加清爽嘅口感，而啲燒豬肉既香且腍，確喺唔錯。事後店長問我哋意見時，話啲豬肉喺「梅頭」，唔怪得咁軟腍。

冰糖桂皮香茅茶 $28

友人就點咗杯熱飲香茅茶，送上枱時反而喺啲玉桂味跑出，香茅味變得有點淡薄，但整體仍覺得好滋潤，飲落舒暢，秋冬天飲一定更正！。

菠蘿冰 $25

小弟就想飲杯凍飲，所以，揀咗菠蘿冰，只可以講喺多冰少菠蘿，仲期望會唔會喺鮮菠蘿貨色，唔似囉，因為有陣陣好濃嘅糖水味。

間唔時食餐越南菜都幾好，離開時經過同街嘅Pho Bar，原來已經結咗業。一向都知做飲食唔容易，希望啲小店繼續努力，等食客享用到更賞心悅目嘅出品。

個人評分
味道：7/10
環境：7/10
服務：8/10
抵食：7/10
平均每人消費：HK$116

餐廳資料：
喜越 I'Annam Banh Mi et Pho
銅鑼灣耀華街30號地下
3460 4407