山區裡的走走趯趯: Lifetastic：生活．衪是的

2018年4月17日星期二

Lifetastic：生活．衪是的

小弟一向都喜歡食、又喜歡做甜品，甜品做得叻就肯定無我份，不過，搞咗咁多年，都知道做唔同甜品有唔同出竅門，尤其搵生果做甜品，就特別麻煩，因為易出水。最近，睇到食友嘅食評，大讚「Lifetastic」嘅「草莓西瓜蛋糕」，搞到有啲心郁郁想試，故此，是晚拉埋表姨甥女一訪「Lifetastic」。

港島西延線幾個站，以「香港大學」站最少嚟，而餐廳就位處地鐵站對面，非常方便。未走入店內，從外已睇到餐廳樓底高，鋪面喺落地大玻璃，更增強整體空間感。

餐廳走歐洲風輕鬆咖啡店形式，木枱、木椅，一面牆上畫上一大張插畫彩繪，趣緻嘅動物，繽紛嘅色彩，為餐廳注入更輕鬆悠閒嘅氣氛。

此外，牆上有不少擺設，都喺精心營造，睇得出花咗唔少心思，就好似餐廳尾嘅「數字」鐘，啲數字亂中有序。而最欣賞喺餐廳唔同角落都擺咗唔少植物，讓人感覺更有生氣。

講咁耐，究竟「Lifetastic」點解？牆畫上就為大家解開店名之謎。你認同嗎？小弟就好認同喇，喜樂喺可以晌每一天都會搵到。

散點餐牌粉紅底配紅字，加上字粒頗細，可能大家都睇得唔太清楚，但儘管都貼出嚟俾大家參考。細看一回，雖然店鋪細細，選擇甚多，尤其茶飲及咖啡類。

仲有見到個特飲推廣餐牌，有凍有熱，列明由咩食材組合，雖然無試，但單睇個賣相及成份配搭，非常有新鮮感。

懶人包就梗喺瞄向套餐，有單人及雙人套餐。先介紹個單人餐，包田園沙律或是日餐湯，再視乎揀咩主菜嚟定價，由$148-$178，並奉送一客是日甜品及基本餐飲一杯，但甜品興餐飲都可以額外加錢轉款，變得彈性大啲。

至於個雙人餐Set ABC，玩法就有啲唔同，分3個價錢：$338、$378、$428，分別在於揀多少道小食、主菜及甜點，同樣奉送沙律或是日餐湯、甜品及餐飲。我哋好想試多佢哋少少甜品，又計過度過，Set C（$428）嘅套餐就最心水，包兩道前菜、兩道小食、兩客甜品。不過，事後發覺出意外，所有菜式嘅份量都比預期多，個餐3個人食都夠，幸而小弟無辜負包底王之名，清得晒所有嘢而無浪費。

田園沙律

計錯數，醒唔起前菜揀咗一道沙律，好應該兩客都揀餐湯，都喺貪樣樣都想試嘅心態。個田園沙律只喺簡單淋上油醋，唔算有咩特別，喺基本啲嘅出品。

蕃茄濃湯

鮮橙色嘅濃湯，睇起嚟就較吸引，入口蕃茄味鮮活香濃，味道自然帶微酸，質感濃稠而幼滑，讓人食完有份開胃感。

小食類有5款選擇，有迷你薄餅、雞鎚、沙律……等等，選上無咁飽肚嘅兩款，包括釀雞翼及沙律。

蘑菇芝士釀有機雞翼

雞翼賣相漲卜卜，咬一口，因為已去晒主骨，所以，食得份外過癮，而雞翼內釀滿芝士，極為香濃，啲雞肉亦十分嫩滑，但蘑菇就唔多覺。

魚子醬蟹肉牛油果沙律

諗住只喺小食一道，但份量絕不小覷，最大亮點，就肯定喺沙律菜面嘅牛油果及蟹肉，前者切片砌成花，入口如牛油般柔滑，而後者份量十足，唔會一兩啖就無晒，至於啲魚子醬就增加賣相靚仔啲，提升道沙律嘅矜貴度。初時仲以為又喺淋上油醋，食多兩口，就發覺喺柚子醋，柚子味甚突出，極欣賞呢道沙律。

主菜方面，則同樣有5款選擇，但主要都喺啲意大利麵或意大利飯類，唔喺太大魚大肉嘅扒類。我哋一人挑選一道菜，表姨甥女就鍾情明太子，小弟就一向喺意大利飯嘅「死粉」。

櫻花蝦明太子蟹肉意粉

上文都講過佢哋嘅份量十足，碟意粉真喺埋到成座小山咁，周邊更灑上唔少櫻花蝦嚟增強口感；而意粉內，除有少少菇菌粒之外，仲混入唔少明太子及芝士，因為，食落有陣陣鹹香辣勁，味道突出；另一方面，意粉都煮得夠咬口，唯一挑剔，就喺個意粉比較乾，入口有點點黏。

意大利牛肝菌雜菇意大利飯配日本帶子

甫上枱，已隱若傳嚟陣陣芝士香，飯粒顯得夠濕潤，入口口感對辦，無一種好生米嘅感覺，卻甚咬口，飯粒更被香濃嘅忌廉汁底包圍住，而飯內有好多菌粒，但菌香就無預期咁強；煎得金黃嘅帶子，果然喺日本嘅刺身級，質感柔綿而彈牙，煎得甘香，正呀！後話，由於先嚟道鹹香嘅意大利粉，之後先食個意大利飯，雖然，中間有以清水清清味蕾，但相信對道飯品確喺有些微影響。