Shop9 Restaurant & Lounge：9仰大名

早前睇到食友寫呢間餐廳，雖然只喺午餐，都頗吸引，而且，性價比高，再問多詳細少少，話間餐廳做菜幾有心，值得一試。西營盤非第一次過嚟，第一街、第二街、第三街都有印象，收工由中環過嚟就更加方便。餐廳位處第三街街角，磚紅色嘅門面好易認，幾分歐陸氣息，從外面睇已見到用餐區分內外。

拾級而上，先入眼簾喺酒吧櫃及室內用餐區，磚牆、木枱、木椅，一派老酒吧嘅格局，但配上柔和嘅燈光，蠻有氣氛，一排落地玻璃，又可以睇睇閒靜嘅街景。

另一邊玻璃門之外，就喺室外用餐區，同樣舒服寫意。雖然是夜清涼，但外面喺可吸煙區域，為免吸二手煙，外面就唔喺好啱我哋喇。

單睇店名及店內格局，就知佢哋有唔少酒賣，餐酒、烈酒、啤酒、雞尾雞……一應俱全。

此外，更有啲美食拼啤酒嘅優惠組合，絕對啱晒好啤酒嘅客人。

食方面又喺點呢？一大張散點菜牌，小食、意粉、意大利飯、肉類、漢堡、沙律及甜品，以一家酒吧餐廳而言，選擇都唔算少喎。

最划算都應該喺揀精選晚餐，晌門口已先睇睇有咩揀，包沙律或餐湯及基本餐飲，主菜5揀1，價位都喺由$108-$208，定價親民，更可以額外加錢轉特飲及配甜品。

仲有，牆上掛有啲廚師推介，睇落以為喺個別菜式，但下面已寫住「免費升級至套餐」，咁又多個抵食選擇。

甘筍忌廉湯

晌吧枱上已註明是日餐湯喺啲乜，甘筍湯啱我吖，而如果揀餐湯嘅話，喺會附上軟熟微暖嘅餐包一個。

呷一口，就知個廚真喺落足心機，因為個忌廉湯嘅甘筍味好濃郁，又清甜，而質感做到幼滑細緻，真喺有點驚喜。

銀魚柳田園沙律

友人就喜歡先食啲沙律嚟開開胃，但個沙律唔喺普普通通沙律菜搭車厘茄嘅田園沙律，而喺仲加埋紫洋蔥、銀魚柳、巴馬臣芝士，再淋上油醋，食味一流，足見廚師誠意。

烤原條豬肋骨伴洋葱圈 $148

主菜方面我哋兩款都揀豬，先上場喺問精選晚餐所揀嘅豬肋骨，果然喺原條，非常大份，被濃濃嘅醬汁覆蓋，十分吸引。

落刀切嗰吓，已感受到啲肉質有幾鬆化，入口果然軟腍富肉汁，燒得啱啱好而唔會好似柴皮咁乾，此外，個BBQ醬超惹味。

炸洋蔥圈火喉拿捏都好，脆口唔油，沾點自家調嘅他他醬，更好食。

澳洲烤香草豬鞍配法式洋蔥汁 $158

另一道主菜就晌廚師推介嗰邊揀嘅豬鞍，件豬鞍裁得極為厚身，睇頭十足，又煎得金黃，底下墊滿法式洋蔥汁。

以往食加拿大豬鞍較多，澳洲貨色亦唔差，肉色粉嫩，口感帶點爽脆感，且滲出淡淡香草味，蘸少少洋蔥汁，更吊起肉香。

一般伴薯菜都千篇一律，但呢道主菜就伴烤薯、車厘茄及烤菠蘿，啲菠蘿燒過後，更清甜。

咖啡、熱檸水

餐飲簡單啲就點咗咖啡及熱檸茶，唔算有咩特別，但調製得較一般嘅大杯。

朱古力蛋糕 +$28

見加配甜點都只喺$28，就點一件試試。之前嘅幾款菜式都睇到廚師嘅誠意，估唔到件朱古力蛋糕都一樣帶嚟驚喜，首先賣相都無迤做，士多啤梨薄片加少少畫花，已經令外觀搶唔少分；而件蛋糕，唔喺就咁得一層朱古力味，細數一下足有6層味道，口感、味道同樣富層次。

西環一帶自港島延線通車後，真喺起咗好變化，不過，離開電車路，走到上嚟第一、二、三街都喺幽靜啲，所以，晌呢啲地方嘅餐廳用餐，感更悠然。嚟到富歐陸色彩嘅「Shop9」，又幾有晌歐洲小餐館用餐嘅感覺。

個人評分
味道：9/10
環境：8/10
服務：8/10
抵食：9/10
平均每人消費：HK$185

餐廳資料：
Shop9 Restaurant & Lounge
西環第三街127B號恆輝大廈地下9號舖
2858 8210