名點心 Famous Dim Sum：旗幟鮮名

細胞小組嘅四月節目喺行山，最後定晌四月最後一個星期日下午。今次都幾齊人，大大細細加埋一行14人，原本打算去酒樓飲餐茶先出發，不過，飲一飲就搞個幾鐘，所以，改為到太子嘅「名點心」食晏。

呢啲小店，可謂快上快落，加上我哋嚟得早，排隊嘅人唔算多。但喺，始終店家嘅地方唔大，我哋14人自然需要分開坐，所以，以下寫嘅都只喺我哋呢枱幾個人所食嘅嘢。地方確喺有點狹窄，亦要有搭枱嘅心理準備，不過，我哋都只喺在於食個晏，嘆吓點心，可謂旗幟鮮明，環境變得其次。

有啲咩食，一張枱墊紙睇晒，順帶一提，茗茶每人收$3（如叫汽水，就免收番茶錢），而茶嘅質素，普普通通咁啦。此外，無加一，實叫實銷！

太子蝦餃 $27

蝦餃嘅外型做得幾工整，雖然，餃皮就唔喺薄到透，但唔黏牙，再者，啲蝦肉鮮甜爽彈，足證用料新鮮。

蟹子燒賣 $25

燒賣做得豐滿大粒，咬落唔會一口都喺肥豬肉，鬆化而帶點爽彈，絕對唔似喺溝粉貨色，加多一點蟹籽，靚啲又有少少卜卜脆口感。

千島炸蝦角 $22

香口嘢當然人人鍾意，件蝦角油就油咗少少，但非常香脆，內裡都喺包住原隻鮮蝦，蝦鮮味盡出。

山竹牛肉球 $18

依家出面食牛肉球就越嚟越細，但呢度啲牛肉球搓得夠晒大個，肉質結實卻甚彈牙，加入點點馬蹄粒同芫荽，增加口感，又香啲。

蜜汁叉燒腸 $20

啲腸粉皮拉得都夠薄，卻唔會好削，透到少少內餡，食落個皮都滑溜，而且，叉燒餡甚多，最好喺瘦叉多過肥肉，健康啲之餘又無咁油。

皮蛋瘦肉粥 $20

老實講，皮蛋跟瘦肉都唔算多，但勝在個粥底煲得夠綿，鹹淡都啱啱好。

千層薑汁糕 $18

作為點心或甜點都得，一層一層做得細緻，入口薑味亦比預期重，但就唔會重到辣口嘅感覺，而口感煙韌黏糯，幾合小弟胃口。

點心即叫即做喺好食好多，呢類小店要成功就要靠質素，蹤觀今餐晏仔，水準唔算喺超班，但質素不賴，夠穩打穩紮，取價亦唔貴。

個人評分
味道：8/10
環境：6/10
服務：8/10
抵食：9/10
平均每人消費：HK$53

餐廳資料：
名點心 Famous Dim Sum
太子運動場道7號B地舖
2398 3183