Fifty Fifty：謎離餐湯

不時都會過嚟長沙灣或荔枝角食飯，皆因沿線親戚多，其中一個表姨甥女較熟稔，一來年齡相約，二來一講旅行嘢、行山嘢就特別投契。早前去咗一轉澳洲，所以，睇相兼食番餐飯。晌網上搵搵，睇見呢間西餐廳開業短短大半年，風評不俗，晚餐都喺二百內，值搏率高。

走進店內，有點點懷舊風，尤其是近門口嘅小擺設，就更明顯喺。而一室以木系傢俬為主，配以柔和燈光，都算有氣氛。

翻翻餐牌，由頭盤、小食、全日早餐、沙律、海鮮及肉類、意大利麵及意大利飯、飲品，到甜品，選擇不少。

當然，唔少得套餐，包括午餐、下午茶餐。

而我哋晚市嚟，目標就梗喺放晌晚餐度啦，定價$88-$198，視乎揀咗咩主菜，另包埋餐湯及餐飲。餐飲可揀任何一款$20以下嘅飲品，轉其他都喺只需補差價。

如果想食得豪啲，不妨考慮個「海鮮拼盤二人晚餐」，賣$468，有一大份海鮮拼盤：波士頓龍蝦、翡翠螺、青口、天使粉紅蝦、法國生蠔、八爪魚，以及意大利麵（3揀1）、主菜（3揀1），送埋甜品及餐飲，睇嚟划算，3個人都或耆夠食呀。但需留意，限星期一至四供應。

熱檸茶

本來杯熱檸茶都無乜好寫，但片檸檬好似啲橙咁大塊，雖然只俾得兩片，但都夠檸味，只喺好奇個檸檬真身有幾大個啫。

榛子咖啡 +$8

晌啲非咖啡店飲鮮奶咖啡，一向都期望唔高，見只喺補差價$8就不妨試試，意外地真喺唔錯。拉花搵出隻鹿仔，觀感已攞唔少分，入口除咗醇香之外，口感好平衡，沖泡嘅手勢幾好。

煎盲鰽魚柳番紅花忌廉汁 $128

表姨甥女話對煎盲鰽感到好奇，所以，試試煎盲鰽魚柳。賣相幾靚仔，魚皮煎得焦香脆口，而魚肉保持嫩滑，亦很有魚味，伴以番紅花忌廉汁，細滑不膩；配以薯蓉、炒翠玉瓜、洋蔥、翡翠苗，整體都覺得好好。女生嘅話，份量剛好，如果男生怕唔夠飽，可以加配白飯或意粉（+$8）。

燒寶雲酥羊架配迷迭香燒汁 $148

有羊架揀就啱晒我啦，選上5乘熟，一客有3支羊架，有兩支份量十足，但中間嗰支得好多肉。以寶雲酥做法，所以，外層沾滿麵包糠，故咬落先香脆，入肉時再軟腍，啲肉亦燒得剛好，仲帶粉嫩色，而羊羶味唔算重，相信大部分人都接受到。伴菜有烚薯、翠玉瓜、炒洋蔥，以蒜蓉炒過，幾好。

是日甜品 +$10

可以額外加錢配甜品，而是晚嘅甜品喺紅莓芝士餅，不過，加得$10得一客就唔好期望好大件，幸而質素不賴，中間芝士餡心味道濃郁，消化餅底夠薄，而紅莓喺用上鮮果肉做，味道天然酸香。

整體嚟講，環境幾舒服，食物亦做得有水準。題外話，可能我哋傾旅行嘢真喺傾得興奮，點餐後，好快就先嚟兩杯飲品，跟住就喺主菜，臨尾上埋甜點。事後睇番啲相，先發覺原來喺漏上餐湯。相信喺店員嘅無心之失，不過，都需要改善啲流程，避免發生同類嘅「意外」。

個人評分
味道：8/10
環境：8/10
服務：6/10
抵食：7/10
平均每人消費：HK$170

餐廳資料：
Fifty Fifty
長沙灣東沙島街青山道181號地下C舖
3612 4901