道鮨日本料理 Michi Japanese Cuisine：道鮨，鮨味成份股！

講到食日本嘢就梗喺食唔少啦，而壽司更不在話下，但「廚師發辦」就一隻手數得晒，都喺兩次咁大把，第一次就晌銅鑼灣嘅「鉄人旨花 」度見識，第二次就晌黃埔嘅「鮨文」滋味重溫。今回，經友人介紹，嚟到新開無耐銅鑼灣嘅「道鮨」，細味「廚師發辦」！

店子位於食廈全層，一出電梯就見，經過門前鮮紅色嘅布簾，就睇到一室裝修甚具和風嘅環境，最代表嘅自然喺三段流水石魚缸擺設，整體感覺傳統而雅緻。

由於壽司吧枱已有熟客訂晒，我哋被安排到吧枱尾內側嘅廂房，房內有啲二人或四人枱，如夠人多，亦可以作為包房之用。當然，食「廚師發辦」以坐吧枱能跟師傅有交流喺最理想嘅位置。

晚市只供應「廚師發辦」，定價$1,200/位（+10%），有問過店員將來會唔會有其他價位嘅選擇，回覆喺考慮中，咁就讓食客多個選擇。然而，食「廚師發辦」喺唔便宜，所以，如果想一試師傅嘅手勢，午餐就嚟得實惠好多。

前菜三味

先登場喺3款賣相的骰精巧嘅前茶，分別帶有高野豆腐、螢光魷魚及日本菠菜，其實唔止靚，所用嘅器皿亦別緻過人，體現出日本菜之美。

高野豆腐睇落以為喺滑溜嘅豆品，一入口就知喺另一回事，口感煙韌，有啲似素食嘅麵筋，吸晒啲湯汁，頗有趣。

螢光魷魚相對就唔會有咩驚喜，但口感柔軟，食味不俗。

日本菠菜伴上櫻花蝦，味道好清，而啲菠菜質感細柔。唯個人覺得，以上前菜三味呢個組合算唔上為客人帶出太多驚喜。

穴子苗

咩喺「穴子」，咪即喺鰻魚囉，曾經晌大坑嘅「八寸」及黃埔嘅「鰭文」生食過，煮熟嚟食反而第一次。啲鰻魚BB好雪白，其實無乜味，但好滑溜，一入口就滑落喉嚨，而伴碟嘅蘿蔔關東煮清甜無渣。

刺身三點

唔使多講，賣相一環就絕對值得俾滿分，3款刺身都各有特色。前端嘅喺海螺，口感爽脆到不得了；中間位置嘅喺水八爪魚，質感柔滑，而最得意喺啲「吸盤」，爽爽哋，好有咬口；最邊邊喺牡丹蝦兩食，青綠色一粒粒嘅喺卵（蝦籽），蝦肉綿柔得嚟帶點有膠質嘅黏性，蝦味鮮甜，蝦頭酥炸，甘脆卻無半點油膩。

清酒煮鮑魚

食壽司前，再嚟一客鮑魚作過場，店員提示我哋，先喺淨食，再嚟就沾點鮑魚膽做嘅醬，最後就喺拼埋啲珍珠米一齊食。淨食時確喺食出鮑魚嘅甜味，口感柔韌；再沾上醬汁時，有種豐腴感；混埋飯粒一齊食，唔喺魚翅撈飯，變咗鮑魚撈飯。

6貫壽司

由於唔喺坐吧枱，所以，逐件逐件上壽司就有點費時失事，故此，下一輪喺壽司登場時，就一次過擺出6貫。眾所周知，食壽司就梗喺由淡到濃較為合宜，不過，有啲人就會隨喜好而食，而壽司飯已加入赤醋作調味，亦塗上適度芥末及醬油，所以，就咁放入口「即食」便可，間場再食點酸薑片有助清清味蕾。

真鯛壽司

小弟唔喺咩壽司達人，逐件逐件壽司評價實在難，只喺以常人口味跟大家分享。真鯛食起嚟比較清爽，魚肉嘅纖維比較細嫩，油份唔會好多。

油甘魚壽司

一撮紅紋喺其標記，個人覺得跟食真鯛有啲差唔多，未喺好能夠分別到，但魚嘅鮮度就好得。順便講講啲飯，雖然未能晌吧位睇師傅搓壽司手勢，但啲飯搓等鬆軟，無種死實嘅感覺。

魷魚壽司

件魷魚好雪白，入口好柔軟，帶少少煙韌感，配鬆軟飯粒，真好。

車海老壽司

呢件車海老非常大隻，一橙一白嘅蝦紋，猶如車呔，所以就叫車海老。肉質好有彈性，跟上面所食嘅牡丹蝦喺好唔同，極富鮮甜味。

吞拿魚壽司

今回唔喺就咁放件吞拿上壽司度，經過一點點處理，令外觀變得精巧好多。味道上，因為有丁點麵豉提鮮，令魚味更出。

赤身壽司

赤身當然比吞拿再正啲啦，色澤嫩紅而有光澤，如牛肉般咁新鮮，肉質好細緻，魚味突出。

燒雞頸肉

豬頸肉就食得多，雞頸肉又喺咩玩法。雞頸肉燒得有點焦香，簡單以鹽同黑椒調味，賣點在於旁邊嘅柚子胡椒醬，少少辣，柚子味突出唯一挑剔喺雞肉有點偏鹹。

小長井生蠔

嚟自長崎嘅生蠔，有個好陌生嘅名字「小長井」，絕對喺第一次試。呢款蠔入口較黏身啲，蠔肉肥美且蠔味重，餘韻長，好新鮮，而生蠔面面金黃色嘅喺酸汁啫喱，可以平衡番個鹹度。

4貫壽司

食廚師發辦只食6件壽司點滿足到大家嘅口癮，再一輪有4貫，而今次睇落明顯比上一輪嘅壽司更高級，唔講咁多，即刻去片。

帶子壽司

睇帶子嘅呎吋，就知喺大大隻嘅刺身級，用料無欺場，而切法都有別常見嘅橫身切開，喺按紋理直切。咬落肉質柔嫩軟綿，味道非常鮮甜。

深海池魚壽司

晶瑩而帶點紅嘅深海池魚望落好有光澤，足見其新鮮度，魚質嫩得嚟帶爽口。

毛蟹壽司

是晚所食嘅壽司，毛蟹壽司喺「賣飛弗」，因為拆蟹麻煩吖嘛。件壽司唔單止鋪滿蟹肉，多到就嚟瀉，而且，更加多件蟹棒。啲蟹肉好鮮甜，極有蟹味，更加咗蟹醋調和，非常滿意。

霜降拖羅壽司

上一輪已經試過吞拿、赤身，呢訂有更高層次嘅霜降拖羅，色澤喺嫩紅色，油脂分布又平衡。唔喺誇張，入口細嚼，油香慢慢晌口腔內爆發，油潤十足。

海膽壽司

海膽嚟自北海道，晌壽司飯之上堆到滿滿，入口甘香豐腴，綿密細膩，紫菜亦十分脆口，唯賣相感覺迤咗啲唔靚仔。

木魚湯

比起上次晌「鉄人旨花」所飲嘅雜魚湯，今回嘅木魚湯就有少少單調咗。雖然店員有提及木魚碎喺即刨，味道亦自然而清香，但個人覺得都喺有少許淡口，尤其食完件海膽壽司，感覺更明顯。

熊本皇后蜜瓜

尾聲，唔喺甜點，就喺上等水果。赤肉嘅皇后蜜瓜，相信有十幾度嘅甜度，入口超甜兼多汁，雖然少少哋得三幾位，但滋味甜入心。

雖然成晚食咗唔少菜式，亦有唔少客，但整體流程暢順，用餐時間兩個半鐘左右，恰如其分，不急不緩；每道菜式送嚟，店員都會作簡單講解，服務不俗。好老實，計埋呢次，都喺食過3次嘅壽司廚師發辦，絕對喺經驗唔多，用料都無欺場，部份菜式見心思，但仍有少部份地方有改進空間。

個人評分
味道：8/10
環境：8/10
服務：8/10
抵食：8/10
平均每人消費：HK$1,320

餐廳資料：
道鮨日本料理 Michi Japanese Cuisine
銅鑼灣渣甸街50號渣甸中心6樓
3523 1045